Էդվարդ Նալբանդյանը՝ ԱՊՀ և ԵՄ շրջանակներում ինտեգրացիոն գործընթացների՝ Երևանի տեսլականի մասին

Հայաստանի արտաքին գործերի նախարար Էդվարդ Նալբանդյանը, Интерфакс-ի թղթակից Հովհաննես Կոսյանին տված հարցազրույցում ներկայացնելով ԱՊՀ և Եվրոպական միության շրջանակներում ինտեգրացիոն գործընթացների՝ Երևանի տեսլականը, մասնավորապես նշել է. «Հակադրման, արհեստական «Կամ-կամ» երկընտրանքի տրամաբանությունն անցյալի ուղեբեռից է: Մենք կողմ ենք ինտեգրման գործընթացների ներդաշնակեցմանը, այլ ոչ թե հակադրմանը»:

Նալբանդյանը նաև ընդգծել է, որ Հայաստանը երբեք չի հայտարարել և չի հայտարարում, որ նախապատվությունը տալիս է եվրո-ատլանտյան կողմնորոշմանը. «Երբ մենք ասում ենք, որ Ռուսաստանի հետ մենք ունենք ռազմավարական դաշինքային հարաբերությունները, այստեղ ավելորդ բառեր հարկավոր չեն, դրանով ամեն ինչ ասված է»: ՀՀ արտաքին գերատեսչության ղեկավարը նաև հավելել է. «Ուզում եմ շեշտել, որ մենք շատ հաջող և դինամիկ հարաբերություններ ենք զարգացնում Եվրոպական միության հետ: Մենք ավարտում ենք Ասոցացման համաձայնագրի նախապատրաստումը, բանակցում ենք խոր և համապարփակ ազատ առևտրի գոտու ստեղծման շուրջ: Շուտով պայմանագիր կկնքենք՝ մուտքի արտոնագրերի ռեժիմի դյուրացման համաձայնագիր»: Նալբանդյանը նաև ընդգծել է, որ Հայաստանը բաց է և կանխատեսելի քաղաքականություն է վարում. «Մեր նպատակն է էլ ավելի ամրապնդել մեր դաշինքային հարաբերությունները, և գործընկերական կապեր հաստատել բոլոր երկրների հետ, որոնք ցանկանում են զարգացնել համագործակցությունը փոխշահավետ հիմքերի վրա՝ հօգուտ՝ երկրների միջազգային և տարածաշրջանային ձևաչափերում առավելագույն ներգրավվածության»:

«Ոչ թե հակադրումը, այլ երկխոսությունը և համագործակցությունը տարբեր ինտեգրացիոն կառույցների միջև կարող են կարևոր ներդրում կատարել մի ընդհանուր տարածքի ձևավորման գործում՝ առանց բաժանարար գծերի, ի շահ բոլոր ազգերի և նրանց ներդաշնակ զարգացման», -եզրափակել է Նալբանդյանը: