«Հայաստանի կորսված գարունը»՝ Էդիկ Մինասյանին. բողոքի ակցիա ԵՊՀ-ի մոտ (լուսանկարներ)

Այսօր Երևանի պետական համալսարանի պատմության ֆակուլտետի շենքի առջև իրենց բողոքի ակցիան էին կազմակերպել «Մարտի 1»-ի զոհերի հարազատները, ովքեր պահանջում էին շրջանառությունից հանել պատմության ֆակուլտետի դեկան Էդիկ Մինասյանի համահեղինակած «Հայոց պատմության» դասագիրքը: Ըստ զոհերի հարազատների՝ դասագրքի մեջ անհիմն մեղադրանք է  ներկայացված խաղաղ ցուցարարներին՝ նրանց ներկայացնելով որպես ջարդարարներ և թալանչիներ: Ծնողներին հատկապես բորբոքել էր այն փաստը, որ մարտի 1-ի զոհերին մեղադրել են երկուստեք հրաձգության մեջ:

«Ես այլևս ոչինչ չունեմ կորցնելու, ինչ ունեի, արդեն կորցրել եմ, ու հիմա, անգամ կմահանամ, միայն թե իմանամ՝ այդ ստահոդ գիրքը վերացվել է: Դրանից վիրավորական բան չկա ինձ համար: Ամոթ է»,-Lurer.com-ի հետ զրույցում ասաց զոհերից մեկի՝ Գոռ Քլոյանի մայրը:

Ակցիայի ընթացքում ծնողները պահանջում էին, որ պատմության ֆակուլտետի դեկան Էդիկ Մինասյանն իջնի և հրապարակավ խոսի իրենց հետ, բայց Էդիկ Մինասյանը համառորեն չհանդիպեց հարազատներին, ավելին, նա համաձայն է գնալ հանդիպման միայն առանց լրագրողների: Թե ինչով կխանգարեին լրագրողներն այդ հանդիպմանը, ոչ ոք չկարողացավ պատասխանել, անգամ ԵՊՀ ռեկտորի օգնական, Հանրապետական կուսակցության անդամ Գևորգ Մելքոնյանը, ով իջել էր ներքև՝ հանդիպելու հարազատներին: Ցավոք, վերջինս ոչ մի սպառիչ պատասխան չէր կարողանում տալ ո՛չ հարազատներին, ո՛չ լրագրողներին:

Ակցիայի մասնակիցները հեռացան ԵՊՀ պատմության ֆակուլտետի շենքի դիմացից առանց հանդիպման. միայն Գևորգ Մելքոնյանի միջոցով հայտարարություն փոխանցեցին Պատմության դեկան Էդիկ Մինասյանին՝ վերջինիս թողնելով նաև գրող, հրապարակախոս Տիգրան Պասկևիչյանի հեղինակած հետաքննական ֆիլմը՝ «Հայաստանի կորսված գարունը»՝ նվիրված 2008 թվականի մարտի 1-ի իրադարձություններին:

{gallery}070{/gallery}