1-ին փուլում աշխատանքի կանցնեն սայլակավոր հաշմանդամները

Դեկտեմբերի 6-ին ՀՀ ԱԻ նախարարությունում տեղի ունեցավ ԱԻՆ աշխատանքի ընդունվելու նպատակով դիմած հաշմանդամություն ունեցող անձանց ներկայացվող չափանիշները գնահատող հանձնաժողովի 2-րդ նիստը, որտեղ ընդգրկված են ԱԻ նախարարության և հաշմանդամների հարցերով զբաղվող հասարակական կազմակերպությունների ներկայացուցիչներ։

Ներկայացնելով ՀՀ ԱԻՆ հաշմանդամություն ունեցող անձանց աշխատանքի ընդունման գործընթացի արդյունքները' ՀՀ ԱԻՆ փրկարար ծառայության տնօրենի տեղակալ, գնդապետ Նիկոլայ Գրիգորյանը մասնավորապես ասաց. «Մինչ օրս ԱԻՆ-ում աշխատանքի ընդունման դիմում է ներկայացրել հաշմանդամություն ունեցող 91 անձ, որոնց մի մասը տեղաշարժվում է սայլակներով: Առաջին փուլում աշխատանքի կընդունվեն հենց այն մարդիկ, ովքեր տեղաշարժվում են միայն սայլակներով, քանի որ նրանք ամենախոցելիներն են: Մենք ստեղծել ենք 30 աշխատատեղ՝ բոլոր անհրաժեշտ պայմաններով: Նախարարի հորդորն ու ուղերձն է' տեղեկացնել բոլոր նման մարդկանց, որ մենք պատրաստ ենք իրենց աշխատանքի ընդունել: Համոզված եմ' այս գործընթացն ազդակ կդառնա մնացած նախարարությունների համար»:

Միանալով Ն. Գրիգորյանի խոսքին՝ ԱՌՆԱՊ հիմնադրամի տնօրեն Մովսես Պողոսյանը նշեց. «Մեր թեմատիկ խումբը ստեղծվել է Հայաստանի Հանրապետության բոլոր հաշմանդամների կարիքների համար աշխատելու նպատակով: Շատ մոտ ապագայում մենք նույն գործունեությունը կծավալենք նաև ՀՀ այլ բնակավայրերում, երբ կստեղծվեն մարզային ՃԿԿ-ները: Սա նաև լավ օրինակ է մյուս գործատուների համար»։

Հանձնաժողովը հարցազրույցի էր հրավիրել աշխատանքի համար դիմած սայլակավոր 11 քաղաքացու։ Նախարարություն էր ներկայացել 9 մարդ, նրանցից 7-ը հարցազրույցի արդյունքներով անցել են հաջորդ փուլ։

«Այս աշխատանքի հնարավորությունը նման մարդկանց թույլ է տալիս զգալ, որ իրենք նույնպես կարող են օգնել ուրիշներին, իսկ դա չափազանց կարևոր է»,- նշեց ՀՀ ԱԻՆ աշխատակազմի անձնակազմի կառավարման բաժնի պետ Հ. Դարբինյանը։

ՀՀ ԱԻ նախարար Ա. Երիցյանի հրամանով երկարացվել է հաշմանդամություն ունեցող անձանց համար նախարարությունում աշխատանքի մրցույթի ժամկետը՝ մինչև 2012 թ. դեկտեմբերի վերջը։