Վրաստանի իշխանությունների գործողությունները երկիրը հեռացնում են ԵՄ-ից. Բորել

Վրաստանի իշխանությունների գործողությունները երկիրը հեռացնում են ԵՄ-ից և թեքում դեպի ավտորիտարիզմ։ Այս մասին Լյուքսեմբուրգում ԵՄ 27 երկրների արտգործնախարարների հանդիպման արդյունքներով լրագրողների հետ հանդիպման ժամանակ հայտարարել է ԵՄ դիվանագիտության ղեկավար Ժոզեպ Բորելը, հաղորդում է NewsGeorgia-ն։

«Իշխող կուսակցությունները, նրանց վերջին գործողությունները, հայտարարություններն ու նախընտրական խոստումները երկիրը հեռացնում են եվրոպական ուղուց և տանում դեպի ավտորիտարիզմ։ Ահա թե ինչու է անդամակցության գործընթացը փաստացի կասեցված։ Դուք տեղյակ եք Եվրոպական ֆինանսավորման հասանելիության վերաբերյալ Հանձնաժողովի որոշումներին»,- ասել է Բորելը:

Նա կոչ է արել սպասել Վրաստանում հոկտեմբերի 26-ին նշանակված խորհրդարանական ընտրություններին։

«Դրանք վճռորոշ փորձություն կլինեն Վրաստանի ժողովրդավարության և դեպի Եվրամիություն նրա ճանապարհի համար», - ասել է դիվանագետը։

Հունիսից ԵՄ-ին Վրաստանի անդամակցության գործընթացը գործնականում կասեցվել է։ Բորելը նաև հայտարարել է Վրաստանի իշխանությունների հետ քաղաքական շփումների կրճատման և նրանց ֆինանսական օգնության վերանայման մեկնարկի մասին։

Հուլիսի 9-ին հայտնի դարձավ, որ ԵՄ-ն սառեցրել է Խաղաղության եվրոպական հիմնադրամի միջոցով Վրաստանին 30 մլն եվրոյի չափով ռազմական օգնության հատկացումը։ Այնուհետև վրացական լրատվամիջոցները և ընդդիմադիր քաղաքական գործիչները հաղորդել են մի շարք ծրագրերի մասին, որոնց ֆինանսավորումը որոշվել է դադարեցնել առանձին եվրոպական երկրներ։