Սկզբում «Հպարտ եմ, որ հայ եմ», ապա՝ «Թուրքիան իմ հայրենիքն է». Ավրաամ Ռուսոն չի կողմնորոշվում

Հալեպի հայկական համայնքի ֆեսբուքյան էջում տեղադրված տեսանյութը մեծ աղմուկ բարձացրեց մեր հասարակության շրջանում, որում երգիչ Ավրաամ Ռուսոն ասում է, որ իր հայրը ծնվել է Հալեպում, իսկ մայրը՝ Դիարբեքիրում, այնուհետ տեղափոխվել են Լիբանան: Նա նաև ասում է, որ կիսով չափ թուրք է, կիսով չափ՝ արաբ՝ հավելելով, որ եկել է Թուրքիա, քանի որ դա է իր հայրենիքը: 

Տեսանյութը գուցե այսքան մեծ քննարկումների ալիք չբարձացներ, եթե ընդամենը մեկ տարի առաջ՝ մարտի 5-ին, Հայաստանում եղած ժամանակ, երգիչը, լրագրողների հետ զրույցում, չնշեր, որ հպարտ է հայ լինելու համար: Ռուսոն ասել էր, թե համատարիմ է իր արմատներին և սիրում է Հայաստանը։ «Հայաստանը հարուստ երկիր չէ, հետևաբար փող ունեցողները պետք է օգնեն մյուսներին։ Բուռ մը հայ ենք, ով կարող է մի բանով օգնել, օգնեք միմյանց»,- հավելել էր Ավրաամ Ռուսոն (Աբրահամ Իբջիրյան): Ի դեպ, երգիչն այս ամենն ասել էր հայերենով։

Ռուսոն այդ ասուլիսի ընթացքում նույնիսկ խոսել էր Հայոց ցեղասպանության մասին: Անդրադառնալով Թուրքիայի կողմից Հայոց ցեղասպանության փաստի ընդունման հարցին՝ երգիչը նշել էր, թե Թուրքիայի համար դա ցավալի հարց է, քանի որ իրենց բարբարոս լինելն է ցույց տալիս. «Թուրքիան բարբարոս երկիր է, արյունով և սրով գրաված ազգ է։ Դրա համար ինչպե՞ս կարող է այդ ազգն ընդունել իր անցյալը, եթե ուզում է Եվրոպա մուտք գործել»։