«Երբ նորաթուխ ԲՀԿ-ականը խոսում է միլիոնավոր հայերի մասին, արդեն զվարճալի է». Շարմազանով

Այսօր՝ դեկտեմբերի 6-ին, տեղի է ունեցել ՀՀԿ գործադիր մարմնի հերթական նիստը: Այն վարել է ՀՀԿ առաջնորդ, ՀՀ նախագահ Սերժ Սարգսյանը:

Նիստից հետո Ազգային ժողովի փոխնախագահ, ՀՀԿ մամլո խոսնակ Էդուարդ Շարմազանովը լրագրողների հետ զրույցում նշել է, որ նիստում քննարկվել են դեկտեմբերի 15-ին կայանալիք համագումարի նախապատրաստական աշխատանքները, ներքին և արտաքին քաղաքականությանն առնչվող հարցեր: Քննարկումներ են եղել նաև ապագա նախընտրական ծրագրի շուրջ:

Մեկնաբանելով ԲՀԿ խոսնակ Տիգրան Ուրիխանյանի այն հայտարարությունը, որով նա զգուշացնում էր Շարմազանովին, որ իր արած յուրաքանչյուր հայտարարություն ուղղված է նաև միլիոնավոր մարդկանց' ԱԺ փոխնախագահն ասաց. «Նախ՝ այն, որ նորաթուխ ԲՀԿ-ականը խոսում է միլիոնների և միլիոնավոր հայերի մասին, արդեն զվարճալի երևույթ է և ժպիտ առաջացնող: Երկրորդը' կարծում եմ' ինքը ոչ ճիշտ թեկնածու է ընտրել շանտաժով և սադրանքով խոսելու, եթե գոնե մի քիչ ուսումնասիրեր իմ կենսագրությունը, կգիտակցեր, որ անօգուտ զբաղմունքով է զբաղված: Երրորդը' վիրավորանքներով խոսում են նրանք, ովքեր որ փաստերից զուրկ են»:

Շարմազանովը նկատեց, որ ինքը ոչ մի անգամ, ինչպես նաև այսօր, վիրավորանքներով չի խոսել: «Չորրորդը՝ բարեկամական խորհուրդ կտամ հաճախակի կուռքեր փոխողին՝ կուռքերի պաշտամունքով չզբաղվել»,- հավելեց նա:

Հարցին՝ նախագահի ինչպիսի՞ թեկնածու կլինի ԲՀԿ առաջնորդ Գագիկ Ծառուկյանը, ՀՀԿ խոսնակը հումորով պատասխանեց. «Կլինի լավագույնը մեր ազգի ապագայի համար»:

Աղբյուրը՝ 1in.am