Առաջիկա երկու տարիներին բնակարանային խնդիրներն աղետի գոտում կլուծվեն. Գալուստ Սահակյան

1988-ի Դեկտեմբերի 7-ին տեղական ժամանակով 11 անց 41 րոպե Հայաստանի հյուսիսային շրջաններում տեղի ունեցած ավերիչ երկրաշարժի հետևանքով ավերվեցին մի շարք քաղաքներ և գյուղեր, եղան հազարավոր զոհեր: Էպիկենտրոնը Սպիտակ քաղաքն էր, որտեղ երկրաշարժի ուժգնությունը գնահատվել էր 10 բալ: 

Այսօր 1988թ. Սպիտակի աղետալի երկրաշարժի 24-րդ տարելիցն է: Ու ցավով պետք է նշել, որ տարերային աղետի ողբերգական իրադարձություններից 24 տարի անց էլ Հայաստանում դեռ չի վերացել «աղետի գոտի» հասկացությունը, և մեր կառավարություն այս հարցում դեռ շատ անելիքներ ունի, չնայած որ «աղետի գոտի», «Սպիտակի երկրաշարժ» հասկացություններն արդեն վաղուց պետք է անցյալ լինեին:

Երկրաշարժից 24 տարի անց, ըստ պաշտոնական տվյալների, 4500 ընտանիք շարունակում է անօթևան մնալ:

Լուրեր.com-ի հետ զրույցում ԱԺ ՀՀԿ խմբակցության ղեկավար Գալուստ Սահակյանն ասաց, որ Դեկտեմբերի 7-ը ողբերգական օր է:

«Ավերիչ երկրաշարժի օրն է, որը մեր ժողովուրդը բավականին ցավով է տանում և դեռ երկար տարիներ կհիշի»,-ասաց Սահակյանը և հավելեց, որ վերջին տարիներին Սերժ Սարգսյանի հանձնարարությամբ բավականին լուրջ շինարարական աշխատանքներ կատարվեցին աղետի գոտում, հազարավոր ընտանիքներ բնակարաններ են ստացել, իսկ շինարարական աշխատանքները դեռ չեն դադարել:

«Առաջիկա տարիներին գոնե որպես իրեղեն ապացույցներ աղետաբեր երկրաշարժը աղետի գոտում չի հիշվի»,- ասաց նա:

Լրագրողի այն հարցին, թե քանի տարի դեռ կպահանջվի անօթևաններին բնակարաններ հատկացնելու համար, Սահակյանն ասաց, որ իր կարծիքով՝ առաջիկա երկու տարիներին հիմնականում բնակարանային խնդիրները աղետի գոտում կլուծվեն: