Վրաստանի ընդդիմադիր կուսակցությունները հայտարարել են, որ չեն ճանաչում ընտրությունների արդյունքները

Ընդդիմադիր «Միասնություն-Ազգային շարժում» և «Կոալիցիա հանուն փոփոխությունների» կուսակցությունների առաջնորդները հայտարարել են, որ չեն ճանաչում խորհրդարանական ընտրությունների վերաբերյալ Կենտրոնական ընտրական հանձնաժողովի հրապարակած տվյալները, ըստ որոնց՝ իշխող «Վրացական երազանք» կուսակցությունը ստանում է խորհրդարանական մեծամասնությունը։

««Միասնություն-Ազգային շարժում» կուսակցության անունից հայտարարում եմ, որ մենք չենք ճանաչում գողացված, առևանգված ընտրությունների արդյունքները»,- ճեպազրույցում ասել է  քաղաքական ուժի նախագահ Թինա Բոկուչավան։

«Կոալիցիա հանուն փոփոխությունների» կուսակցության նախագահ Նիկա Գվարամիան հայտարարել է, որ քաղաքական ուժը նույնպես չի ճանաչում ընտրությունների տվյալները՝ այն անվանելով «սահմանադրական հեղաշրջում»։

«Ուժեղ Վրաստանը» («Լելո», «Ժողովրդի համար» կուսակցություններ և «Ազատության հրապարակ» սոցիալական շարժում)նույնպես հայտնել է, որ չի ճանաչում ընտրությունների արդյունքները։ 

Խորհրդարանական ընտրություններում իշխող «Վրացական երազանք» կուսակցությունը հավաքել է ձայների 54,2 տոկոսը՝ քվեաթերթիկների 99 տոկոսի հաշվարկից հետո։

Օրենսդիր մարմին են մտնում նաև 5 տոկոսի շեմը հաղթահարած հիմնական ընդդիմադիր կուսակցությունները, այդ թվում՝ «Միասնություն-Ազգային շարժում» (մոտ 10%), «Կոալիցիա հանուն փոփոխությունների» (մոտ 11%), «Ուժեղ Վրաստան» (մոտ 8,7%) և «Վրաստանի համար» (մոտ 7,7%)։ Ընդհանուր առմամբ, ընդդիմությունը հավաքում է ձայների մոտ 37 տոկոսը։