ԵՄ-ի անդրադարձը Հայաստանում հակակոռուպցիոն ռազմավարության մշակման հետ կապված խնդիրներին

2012 թ . դեկտեմբերի 7-ին ԵՄ խորհրդատվական խումբն անցկացրեց կլոր սեղան՝ նվիրված Հայաստանում հակակոռուպցիոն միջոցառումների շրջանակի մշակմանը: Պետական պաշտոնյաները, քաղաքացիական հասարակության և միջազգային կազմակերպությունների ներկայացուցիչները քննարկեցին ապագա ռազմավարությունների մշակման տարբերակները և փորձեցին համաձայնության գալ այն հարցի շուրջ, թե Հայաստանն ինչպես կարող է առաջ շարժվել գալիք ամիսների և տարիների ընթացքում:

Կլոր սեղանի ընթացքում մասնակիցները քննարկեցին կոռուպցիայի պատճառների վերլուծության, ռազմավարությունների ձևավորման և հակակոռուպցիոն շրջանակն ամրապնդելուն ուղղված միջոցառումների հետ կապված լավագույն գործելակերպերը: Հատուկ ուշադրություն դարձվեց հակակոռուպցիոն շրջանակի և ռազմավարության մշակման գործում քաղաքացիական հասարակության ներգրավման հետ կապված ԵՄ հեռանկարներին: ԵՄ փորձագետը ներկայացրեց դեռևս մշակման փուլում գտնվող խորհրդատվական փաստաթղթի Ուրվագիծը: Այն ուսումնասիրում է Հայաստանի հակակոռուպցիոն ներկայիս շրջանակը և ներկայացնում հակակոռուպցիոն ռազմավարություններ մշակելու լավագույն գործելակերպերը:

Փաստաթղթում վեր են հանվում այն խնդիրները, որոնք ուղեկցում են հակակոռուպցիոն ռազմավարությունների մշակման գործընթացներին , և դիտարկվում է հակակոռուպցիոն ռազմավարությունների կառուցվածքների միջազգային լավագույն փորձը, ինչպես նաև ավելի լայն քաղաքական համատեքստի կարևորությունը ռազմավարության մշակման գործընթացում: Փաստաթուղթը կներկայացվի 2013-ի ընթացքում հրապարակային միջոցառման ժամանակ:

Կլոր սեղանին ելույթ ունեցան դեսպան Տրայան Հրիստեան՝ ԵՄ պատվիրակության ղեկավարը, Պատրիս Կյող-Բիզոն՝ ՄԱԿ-ի Զարգացման ծրագրի ժամանակավոր Մշտական ներկայացուցիչը, Գեորգի Կուտոյանը ՀՀ Նախագահի աշխատակազմից, ներկայացուցիչներ Թրանսպարենսի ինթերնեշնլից, Էթիկայի հանձնաժողովից և Հայաստանի երիտասարդ իրավաբանների ասոցիացիայից: