Որդիս անմեղ է, անօրեննե՛ր. հացադուլ նախագահականի դիմաց (տեսանյութ)

Այսօր նախագահական նստավայրի դիմաց նստացույց էր հայտարարել քաղաքացի Անահիտ Չտրկյանը: Վերջինս Լուրեր.com-ի հետ զրույցում նշեց, որ իր որդուն դատապարտում են 12 տարվա ազատազրկման, սակայն նա անմեղ է:

«2011-ի հուլիսի 23-ին ԱԱԾ աշխատակիցները (թվով 8 հոգի) ներխուժեցին մեր տուն` որդուս ձեռքերը շղթաներ հագցրած: Մեր տունը խուզարկեցին և ոչինչ չգտան: Ե՛վ որդիս, և՛ մենք չգիտեինք, թե ինչու էին խուզարկում մեր տունը: Այն հարցին, թե ուր է համակարգիչը, որը գլխավոր մեղադրյալ Կարեն Մեհրաբյանն օգտագործել է, որդիս, քանի որ ոչնչից տեղյակ չէր, պատասխանեց, որ տան խուզարկությունը թող ավարտեն, հետո կտանի քեռու տուն և համակարգիչը կհանձնի նրանց: Քեռու տունը մեր տանից հեռու չէ: Խուզարկությունից հետո որդիս ուղեկցեց նրանց քեռու տուն:

Մեկ օր առաջ գլխավոր մեղադրյալ Կարեն Մեհրաբյանը որդուցս համակարգիչ էր խնդրել, որպեսզի «սկայպով» խոսի Վանաձորում գտնվող կնոջ հետ, որովհետև տարաձայնություններ ուներ: Քանի որ մեր նոթբուքը տանը չէր, որդիս Կարենին ուղեկցում է քեռու տուն, և Կարենը խնդրում է առանձին թողնել իրեն: Ինչ իմանար որդիս, որ ԱԱԾ քննիչ Ա. Թևանյանը և Կարեն Մեհրաբյանը որդուս գխին սարքել են և ինչ-որ տեղեկություններ են հաղորդել համակարգչով: Այդ սքան արած թղթերը ԱԱԾ քննիչ Ա. Թևանյանն էր տվել Կարենին և ոչ մի գաղտնի տեղեկություն չէին պարունակում: Ինչ իմանար որդիս.

1. Եթե որդիս իմանար, որ Կարեն Մեհրաբյանը ինչ-որ բան է հաղորդել համակարգչով, ապա ինչո՞ւ պետք է ԱԱԾ աշխատակիցներին համակարգչի տեղը ցույց տար:

2.ԱԱԾ աշխատակիցներն առգրավման թուղթ չունեին, բայց որդիս առանց առգրավման թղթի իր ձեռքով հանձնել է համակարգիչը: 

3. Քեռու տանը մեկի փոխարեն երեք համակարգիչ կար. որդիս կարող էր մյուս համակարգիչը հանձներ, եթե իմանար այդ մասին:

4. Որդիս ծրագրավորող է: Եթե իմանար, որ Կարենը գաղտնի տեղեկություններ է հաղորդել, ապա սխեման համակարգչից կհաներ կամ համակարգիչը: 

Այս ամենը ապացույցն է այն բանի, որ որդիս տեղեկություն չի ունեցել գլխավոր մեղադրյալ Կարեն Մեհրաբյանի գործունեությունից:

Մյուս մեղադրանքն այն է, թե իբր որդիս Թուրքիայից 300 դոլար է ուղարկել Կարեն Մեհրաբյանին Հայաստան»:

Մանրամասները` տեսանյութում.