Հրանուշ Հակոբյանի ցավակցական խոսքը

ՀՀ սփյուռքի նախարար Հրանուշ Հակոբյանը ցավակցել է անվանի դիվանագետ, Մեծ Բրիտանիայի և Հյուսիսային Իռլանդիայի Միացյալ Թագավորությունում և Իռլանդիայում Հայաստանի Հանրապետության արտակարգ և լիազոր դեսպան Կարինե Ղազինյանի մահվան կապակցությամբ: Տեքստն ամբողջությամբ կարդացեք ստորև.

«Կարինե Ղազարյանի ընտանիքի անդամներին, բարեկամներին

Անհավատալի է, որ այսօր գրիչս պետք է վերցնեմ ու ցավակցական խոսք ասեմ մի մարդու մասին, ով լի էր կյանքով, ջերմությամբ ու սիրով:

Անսպառ էներգիան, ժպիտն ու մարդկային հմայքը զարդարում էին Կարինեին: Նրա անունը տալիս ջերմությունն ու ներքին ուրախությունը պարուրում էին մեզ:

Ծնվելով և դաստիարակվելով մի փառավոր ընտանիքում, որը վայելել է իմ ընտանիքի բարեկամությունն ու սերը՝ նա ժառանգել էր իր ծնողների փայլուն, դրական հատկանիշները և իր գիտակցական կյանքում կարողացել ծառայեցնել դրանք մարդկանց, ժողովրդին, պետությանը:

Խորն է յուրաքանչյուրիս ցավը. խնդրում եմ ընդունեք իմ անկեղծ և սրտակից ցավակցությունները:

Անդառնալի կորստի այս դժվարին պահին անհուն կսկիծով կիսում եմ ձեր ընտանիքի վիշտը:

Համոզված եմ, որ Կարինե Ղազինյանի բարի անունը միշտ վառ է մնալու նրան ճանաչողների հիշողություններում՝ որպես փորձառու դիվանագետ և պետական գործիչ, որպես պարզ ու անմիջական մարդ, որպես հոգատար մայր և լավագույն ընկեր:

Ափսոս, հազա˜ր ափսոս, որ դադարեց բաբախել նրա մեծ, մարդկային և սիրող սիրտը:

Կարինեի կորուստը ոչ միայն իր ընտանիքի, այլև մեր ազգի ու կառավարման համակարգի կորուստն է:

Ձեզ ուժ և կամք՝ հաղթահարելու խոր վիշտը»: