Համակարգչային լսարան՝ 2-րդ բանակային կորպուսի թիվ N զորամասին

Հայաստանի երիտասարդական հիմնադրամը (ՀԵՀ) դեկտեմբերի 7-ին 2-րդ բանակային կորպուսի թիվ N զորամասում բացեց համակարգչային լսարան, որը հագեցած է ժամանակակից տեխնիկայով։ Այս տարի սա արդեն երկրորդ համակարգչային լսարանն է, որ ՀԵՀ-ը նվիրում է զորամասերին։ Առաջին լսարանը բացվել էր սեպտեմբերին ՀՀ ՊՆ մարշալ Բաղրամյանի անվան ուսումնական զորամասում։

Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը նկատեց, որ տեղեկատվական տեխնոլոգիաները մեծ դեր ունեն բոլոր ոլորտներում։ Նա նշեց, որ նորաբաց լսարանը զինվորներին և սպաներին կօգնի ավելի լավ ու արդյունավետ կազմակերպել ուսումնական գործընթացը, հետ չմնալ տեխնոլոգիական զարգացումներից, տիրապետել հսկայածավալ տեղեկատվությանն ու ապահովել շարունակական կրթությունը։ Ա. Տեր-Հովակիմյանը տեղեկացրեց, որ համակարգիչներն ապահովված են տարբեր ծրագրերով, առաջիկայում զորամասին կտրամադրվի նաև էլեկտրոնային գրադարան։

ՀՀ պաշտպանության նախարարի առաջին տեղակալ Դավիթ Տոնոյանը նշեց, որ նման լսարանները զինծառայության մեջ գտնվող երիտասարդներին հնարավորություն են տալիս չկտրվել նախազորակոչային շրջանում ստացած կրթությունից։ Բացի այդ, զորացրումից հետո ուսումը շարունակել ցանկացող զինծառայողները կկարողանան նախապատրաստվել՝ կիրառելով ժամանակակից տեխնոլոգիաները։

Ժամկետային զինծառայող Օգսեն Թարվերդյանը Երևանից է, ավարտել է Հայաստանի պետական ճարտարագիտական համալսարանը, ծրագրավորող է։ Նա ինքն է համակարգիչները տեղադրել, միացրել, ներբեռնել համապատասխան ծրագրեր։ Օգսենը պատրաստակամ է իր համակարգչային հմտությունները փոխանցել ընկերներին։

Զինծառայող Գուրգեն Պետրոսյանը տեղեկացրեց, որ զորամասն ունի իր թերթը, ռադիոկայանը, որոնք կյանքի են կոչվում զինծառայողների ուժերով։ Ունեն նաև հարուստ տեսաարխիվ, պատրաստում են տեսանյութեր, հեռուստահաղորդումներ զորամասի մասին։ Եվ նորաբաց համակարգչային լսարանը, ըստ զինծառայողների, կհեշտացնի իրենց աշխատանքները։

Մինչև տարվա վերջ ՀԵՀ-ը նախատեսում է համակարգչային լսարաններ բացել ևս երկու զորամասում։