Վրաստանի նախագահ Զուրաբիշվիլին դիմել է Սահմանադրական դատարան՝ ընտրությունները կեղծված ճանաչելու համար

Վրաստանի նախագահ Սալոմե Զուրաբիշվիլին հայց է ներկայացրել Սահմանադրական դատարան՝ երկրում կայացած խորհրդարանական ընտրությունների արդյունքները կեղծված ճանաչելու համար։ Այս մասին հայտնում է ՏԱՍՍ-ը՝ հղում անելով փաստաբան Էկա Բեսելիային, որը դատարանում կներկայացնի Զուրաբիշվիլիի շահերը։

Փաստաբանը նշել է, որ Վրաստանի նախագահի հայցում նշվում է սահմանադրական իրավունքների երկու խախտում. Առաջինը կապված է ունիվերսալության սկզբունքի խախտման հետ։ Փաստաբանի խոսքով, արտերկրում բնակվող Վրաստանի քաղաքացիները սահմանափակված են եղել իրենց սահմանադրական իրավունքների մեջ, քանի որ նրանց «արգելել են» մասնակցել ընտրություններին։

«Երկրորդ կարևորագույն սկզբունքը քվեարկության գաղտնիությունն է։ Քվեարկության գաղտնիության խախտման վերաբերյալ մեկից ավելի ապացույց կա, ինչը սահմանադրական նորմերի խախտում է»,-ասել է Բեսելիան։

Վրաստանում հոկտեմբերի 26-ին ավարտվել են խորհրդարանական ընտրությունները։ Ընտրություններում հաղթել է իշխող «Վրացական երազանք-Ժողովրդավարական Վրաստան» կուսակցությունը։ Սակայն ընդդիմությունն ու Վրաստանի նախագահը հրաժարվում են ճանաչել ընտրությունների արդյունքները։