«Վրացական երազանքը» վարչապետի պաշտոնում առաջադրել է վարչապետ Կոբախիձեի թեկնածությունը

Իշխող «Վրացական երազանք-Ժողովրդավարական Վրաստան» կուսակցության հիմնադիր և պատվավոր նախագահ Բիձինա Իվանիշվիլին վարչապետի պաշտոնում առաջադրել է կառավարության ներկայիս ղեկավար Իրակլի Կոբախիձեի թեկնածությունը։ Այս մասին «Վրացական երազանքի» քաղխորհրդի նիստից հետո ճեպազրույցում հայտարարել է կուսակցության գործադիր քարտուղար Մամուկա Մդինարաձեն, փոխանցում է ՏԱՍՍ-ը։

«Մեր կուսակցության կանոնադրության համաձայն՝ պատվավոր նախագահը վարչապետի թեկնածու առաջադրելու իրավունք ու լիազորություններ ունի, և զարմանալի ոչինչ չկա, որ Բիձինա Իվանիշվիլին ներկայացրեց վարչապետի թեկնածու քաղխորհրդի կողմից»,- ասել է Մդինարաձեն: Նրա խոսքով, խորհրդարանի խոսնակի թեկնածուն կլինի օրենսդիր մարմնի ներկայիս ղեկավար Շալվա Պապուաշվիլին։

Նոր գումարման խորհրդարանի առաջին նիստը տեղի կունենա նոյեմբերի 25-ին։ Այն բանից հետո, երբ խորհրդարանը ստանձնի իր իրավունքներն ու լիազորությունները, ներկայիս կառավարությունը, վարչապետի գլխավորությամբ, ինքնաբերաբար հրաժարական կտա։ Նախարարներն ու վարչապետը կգործեն մինչև նոր կաբինետի նշանակումը։