Սուպեր Սաքոն ուզում է պատգամավո՞ր դառնալ

Սուպեր Սաքոյի ֆոտոշարքերից մեկի բարձրացրած սկանդալային աղմուկին հաջորդեց առժամանակ լռություն եւ միայն վերջերս Միացյալ Նահանգներում տեղի ունեցած մրցանակաբաշխության ժամանակ ամերիկաբնակ ռեփերի ու Ազատ Հակոբյանի դուետն արժանացավ լավագույնի կոչմանը: Սուպեր Սաքոն իր գործունեության ու մտադրությունների մասին պատմել է BRAVO.am-ին.

«Ես չեմ մոռացվել, բայց  թվում է, թե մոռացվել եմ: Հիմա ամենալավ վաճառվող ձայնասկավառակն իմն է ինչպես Միացյալ Նահանգներում, այնպես էլ Հայաստանում:

Չեմ սիրում տեսահոլովակ նկարել ինձ գովազդելու համար: Անընդունելի եմ համարում հեռուստաընկերություններին վճարել, որ իմ տեսահոլովակը ցուցադրեն: Ով սիրում է ինձ, ցույց է տալիս:

Շուտով մենահամերգս կլինի Մարզահամերգային համալիրի մեծ դահլիճում: Նոր ձայնասկավառակս՝ «Saint Sarkis IV»-ը, լույս է տեսել հոկտեմբերին:

Հիմա զբաղված եմ համերգներով եւ նոր երգերի ձայնագրմամբ: Հաջորդ ստեղծագործությունս կլինի իմ շատ սիրելի ընկերոջ ու սիրված երգիչ Արման Հովհաննիսյանի հետ:

Ստեղծագործականից բացի, կենտրոնացած եմ բարեգործական ընկերության՝ «Saint Sarkis Children's Fund»-ի գործունեության վրա: Ամենից շատ ուշադրություն եմ դարձնում հաշմանդամություն ունեցող եւ ծնողազուրկ երեխաներին:

Մյուս տարվա մեջ տեղի ունենալիք համերգիս հասույթը չեմ տալու ոչ մեկին. չեմ վստահում: Բայց այդ երեխաների կարիքների համար եմ հատկացնելու:

Չեմ անում բարեգործություն, որ նկարեն, խոսեն: Կարեւորն այդ երեխաներն են ու Աստված, որ տեսնում են:

Աղջիկս՝ Ջիանան, արդեն մեկուկես տարեկան է: Չարաճճի, բայց շատ խելացի երեխա է: Ոչ մեկին չեմ ուզում նկարները ցույց տալ. առանց այդ էլ աչքերով ուտում են: Նախագծեր կան, որոնց մասին դեռ չեմ խոսի:

Երանի ես ապրեի Հայաստանում: Ու եթե լինեի Ազգային ժողովում, այդ ժամանակ Հայաստանում կարիքավոր ոչ մի երեխա չէր լինի. կպարտադրեի, որ ամեն ընտանիք մեկ երեխա որդեգրի»: