Հայտնի է Վրաստանում նախագահական ընտրությունների օրը

Վրաստանում նախագահական ընտրությունները տեղի կունենան դեկտեմբերի 14-ին, իսկ երդմնակալության արարողությունը՝ դեկտեմբերի 29-ին։ Այս մասին բյուրոյի նիստում հայտարարել է խորհրդարանի նախագահ Շալվա Պապուաշվիլին, հայտնում է Sputnik Georgia-ն։

Վրաստանի օրենսդիր մարմնի ղեկավարը բյուրոյին առաջարկել է նախագահական ընտրությունների ամսաթիվը և համապատասխան բանաձևի նախագիծը, որը կներկայացվի լիագումար նիստին։

Սալոմե Զուրաբիշվիլին Վրաստանի վերջին ուղղակիորեն ընտրված նախագահն է։ Հաջորդ նախագահին կընտրի 300 հոգանոց ընտրական կոլեգիան, որի կազմում կլինեն Վրաստանի խորհրդարանի պատգամավորներ, Աջարիայի և Աբխազիայի Ինքնավար Հանրապետության Գերագույն խորհուրդների անդամներ, ինչպես նաև ինքնակառավարման մարմինների ներկայացուցիչներ։

Լրատվամիջոցների վարկածներից մեկի համաձայն՝ Վրաստանի ապագա նախագահը կարող է լինել նախկին վարչապետ, այժմ «Վրացական երազանք» կուսակցության նախագահ Իրակլի Ղարիբաշվիլին։