Սուսաննա Պետրոսյան. Կյանքի արժեքները փոխվել են, ես էլ փոխված կլինեմ

Երգչուհի Սուսաննա Պետրոսյանը «Հայ Սուպերսթար» երաժշտական նախագծի առաջին եթերաշրջանի հաղթողն է: Այժմ Սուսաննան շարունակում է ստեղծագործել և հանդիսատեսի դատին ներկայացնել նոր երգեր ու տեսահոլովակներ: Ձեզ ենք ներկայացնում երգչուհու՝ 168.am–ին տված հարցազրույցը։

- Սուսաննա, կպատմե՞ս՝ ինչի՞ց սկսվեց, այսպես ասած, երաժշտական կարիերադ:

- Երբ փոքր էի, մայրիկս ինձ համար միշտ երգում էր: Ես շատ էի սիրում իրեն լսել: 4 տարեկանից սկսեցի «Հայաստանի փոքրիկ երգիչներ» երգչախմբում երգել, իսկ 6 տարեկանում ընդունվեցի Պ. Ի. Չայկովսկու անվան միջնակարգ երաժշտական դպրո՝ դաշնամուրային բաժին: Երգչուհու կարիերան էլ սկսվեց «Հայ Սուպերսթար» նախագծից:

- Այս տարիների ընթացքում ի՞նչ դժվարությունների ես հանդիպել:

- Այս տարիների ընթացքում շատ դժվարություններ են եղել: Դրանց շնորհիվ՝ որոշ հարցերի շուրջ սկսել եմ այլ կերպ մտածել: Կյանքի արժեքները փոխվել են, ես էլ փոխված կլինեմ (ժպտում է - Գ. Ա.):

- Ամենակարևոր ու նշանակալի հաջողությունդ ո՞րն էր:

- Կյանքիս ամենակարևոր հաջողությունն այն է, որ իմ ընտանիքում եմ ծնվել և հայ եմ: Իսկ ձեռքբերովի հաջողությունները շատ են: Չեմ կարող մեկը նշել: Կյանքիս յուրաքանչյուր փուլն իր հաջողությունն է ունեցել:

- Ո՞վ է Սուսաննա Պետրոսյանի հանդիսատեսը:

- Սուսաննա Պետրոսյանի հանդիսատեսն ամենաբարի և ամենալավ հանդիսատեսն է, այն մարդիկ են, ովքեր սիրում են իմ երգելաոճը (ժպտում է.- Գ. Ա.):

- Հայաստանում որպես լավ ու սիրված երգչուհի կայանալու գործընթացը դժվարի՞ն է:

- Հայաստանում երգչուհու ուղին շատ դժվար է: Կայանալու խնդիրը ճաշակի թելադրման մեջ է: Ես չեմ փորձում կայանալ: Ես ուղղակի ապրում եմ երաժշտությամբ, այն ինձ ոգեշնչում է:

- Դու նաև ստեղծագործում ես: Ինչո՞ւ մինչ այժմ քո հեղինակային երգերը չես կատարել:

- Երբ զգամ դրա պահանջը, միգուցե կատարեմ: Ինչ վերաբերում է համերգային գործունեությանս, ապա ակումբներում փոքրիկ համերգներ ունենում եմ, բայց դեռ մեծ համերգների մասին չեմ մտածում:

- Պրոդյուսեր չունես, պատճառն այն է, որ ի՞նքդ չես ցանկանում, թե՞ առաջարկներ չեն եղել:

- Առաջարկներ եղել են, բայց ես այդպես չեմ ցանկանում աշխատել:

- Ինչպիսի՞ հոգեվիճակում պետք է լինես, որ կարողանաս ստեղծագործել:

- Յուրաքանչյուր հոգեվիճակ ստեղծում է իրեն շատ նման երաժշտություն: Բոլոր իրավիճակներում էլ կարելի է ստեղծագործել, ուղղակի երգերն են փոխվում:

- Առաջիկայում ի՞նչ ծրագրեր ունես:

- Հաջորդ տարվա սկզբին կաշխատեմ նոր երգս ներկայացնել: Բառերն ինքս եմ գրում, իսկ երաժշտության հեղինակն Արթուր Ալեքն է:

- Իսկ կա՞ մի կարգախոս, որով առաջնորդվում ես:

- Ոչ, չունեմ: Աշխատում եմ կյանքիս ամեն վայրկյանն անկեղծության և ջերմության մեջ ապրել: