Թբիլիսիում ոստիկանությունը ձերբակալել է 107 մարդու

Ոստիկանությունը Թբիլիսիի կենտրոնում բողոքի ցույցի ժամանակ ձերբակալել է 107 մարդու, ովքեր համաձայն չեն Վրաստանի իշխանությունների որոշման հետ` հետաձգելու Եվրամիությանը երկրի անդամակցության շուրջ բանակցությունները, ասվում է Վրաստանի ՆԳՆ հաղորդագրության մեջ, փոխանցում է Sputnik Georgia-ն։

Բողոքի ակցիան մայրաքաղաքում վերսկսվել է նոյեմբերի 29-ին՝ ժամը 19:00-ի սահմաններում։ Ընդդիմությունը, նրանց ակտիվիստները և շարքային քաղաքացիները բողոքում են Վրաստանի իշխանությունների՝ նոյեմբերի 28-ին կայացրած որոշման դեմ՝ օրակարգից հանելու Եվրամիությանը երկրի անդամակցության շուրջ բանակցությունները մինչև 2028 թվականը։

«Չնայած ՆԳՆ-ի բազմաթիվ ահազանգերին՝ Ռուսթավելի պողոտայում՝ խորհրդարանի շենքի մոտ ակցիան մեկ անգամ չէ, որ դուրս է եկել «Ժողովների և ցույցերի մասին» օրենքով սահմանված սահմաններից»,- ասված է ՆԳՆ հաղորդագրության մեջ։

Ներքին գործերի նախարարության տվյալներով՝ բոլոր 107 ցուցարարները վարչական կարգով բերման են ենթարկվել մանր խուլիգանության և ոստիկանության հրահանգներին չենթարկվելու համար։