Խախտումներ ամենից շատ արձանագրվել են դատախազությունում և ՊՆ-ում. Կարեն Անդրեասյան

Ինչպես արդեն տեղեկացրել էինք, այսօր Մարդու իրավունքների պաշտպանության օրն է: Այս առթիվ ՀՀ Մարդու Իրավունքների Պաշտպան Կարեն Անդրեասյանը լրագրողների հետ հանդիպման ընթացքում խոսեց 2012թ. պետական մարմինների կողմից մարդու իրավունքների խախտման վիճակագրության մասին: Նա նշեց, որ այս տարի ՄԻՊ գրասենյակի կողմից կայացվել է 27 խախտման որոշում, որոնցից ամենաշատը խախումներ գրանցվել են ՀՀ դատախազությունում և պաշտպանության նախարարությունում.  ՀՀ դատախազություն՝ 6, ՀՀ պաշտպանության նախարարություն՝ 6, ՀՀ աշխատանքի և սոցիալական հարցերի նախարարություն՝ 4, Երևանի քաղաքապետարան՝ 2, ՀՀ ԿԱ ոստիկանություն՝ 2, ՀՀ կրթության և գիտության նախարարություն՝ 1, ՀՀ արտաքին գործերի նախարարություն՝ 1, ՀՀ ԿԱ պետական եկամուտների կոմիտե՝ 1, ՀՀ ԿԱ պետական գույքի կառավարման վարչություն՝ 1»,- ներկայացրեց վիճակագրությունը Կարեն Անդրեասյանը՝ շարունակելով, որ իր պաշտոնավարության առաջին իսկ օրից ասել է, որ ՀՀ-ում մարդու իրավունքների ամենամեծ խոցը, քաղցկեղը դատարաններն են, որոնք ՀՀ-ում մարդու իրավունքների պաշտպանության ամենամեծ երաշխավորը պետք է լինեն:

Կարեն Անդրեասյանի խոսքով՝ Հայաստանում առկա է մի շատ կարևոր խնդիր, օմբուդսմենն արձանագրում է խնդիրը, իսկ պետական մարմինը չի համաձայնում. «Պատճառները տարբեր են՝ սկսած այն բանից, որ չեն ցանկանում աշխատանքից ազատել իրենց սիրելի աշխատակցին՝ քաղաքական ինչ-ինչ պատճառներից ելնելով:

Այս տարի սեփական իրավունքների պաշտպանությանն օմբուդսմենի միջոցով հետամուտ է եղել շուրջ 5600 մարդ: Այդ մարդկանցից մի մասին տրամադրել ենք իրավաբանական խորհրդատվություն, իսկ 2290 դիմումների ընթացք ենք տվել: Դրանց ընթացք տալուց հետո պարզվել է, որ 820 մարդու բողոք հիմնավոր է, և այդ հիմնավոր դժգոհությունները հիմնականում վերաբերել են հետևյալ մարմիններին. ՀՀ ոստիկանություն (167 բողոք), ՀՀ աշխատանքի և սոցիալական հարցերի նախարարություն (97 բողոք), ՀՀ արդարադատության նախարարություն (91 բողոք), ՀՀ պաշտպանության նախարարություն (68 բողոք), Երևանի քաղաքապետարան (52 բողոք)»,-պարզաբանում է Անդրեասյանը: