ՀՀ-ում չկա անկախ դատաիրավական համակարգ. ՀՀԿ-ական պատգամավոր

«Մարդու իրավունքների ոլորտում մենք շատ անելիք ունենք: Որոշ դեպքերում դրական առումով մեծ է հատկապես քաղաքացիական ակտիվիստների դերը: Նկատվում է նաև, որ բնապահպանական խնդիրների հետ կապված քաղաքացիական հասարակությունն ակտիվ է աշխատում, նաև բանակում տեղի ունեցող որոշ դեպքերին է անդրադարձ լինում»: Այս մասին այսօր լրագրողների հետ հանդիպմանն ասաց ԱԺ մարդու իրավունքների պաշտպանության և հանրային հարցերի մշտական հանձնաժողովի փոխնախագահ Մարգարիտ Եսայանը: 

Ըստ պատգամավորի՝ Հայաստանում չկա անկախ դատաիրավական համակարգ, ոլորտն ունի լուրջ բարեփոխումների կարիք: Ինքն անձամբ այցելելով ՔԿՀ-ներ՝ ականատես է եղել, թե ինչպես են մեծ թվով դատապարտյալներ գտնվում շատ փոքր խցերում և ապրում են ոչ նորմալ պայմաններում:

Վերջինս նշեց նաև, որ իրեն՝ որպես հանձնաժողովի փոխնախագահի, բազմաթիվ դիմում-բողոքներ են գալիս, բայց դրանք հիմնականում կենցաղային բնույթի են լինում: «Օրինակ՝ մարդիկ բողոքում են իրենց հարևաններից, որ նրանց բարձրացրած աղմուկը ոտնահարում է իրենց իրավունքները: Անկեղծ ասած, ես չեմ հասկանում, թե ինչու են ինձ դիմում նման հարցերով: Ես չգիտեմ՝ ինչ կարող եմ անել: Մարդու իրավունքների ոտնահարման վերաբերյալ լուրջ դիմում-բողոք առ այսօր չեմ ստացել»,-նկատում է պատգամավորը: