Գիշերային ակումբի տնօրենը «Պռադոյով» բախվել է «06»-ին. պարուհի Սիրուշոն տեղափոխվել է հիվանդանոց

Այսօր՝ դեկտեմբերի 10-ին, ավտովթար է տեղի ունեցել Երևանում: Ժամը 08:00-ի սահմաններում, Գարեգին Նժդեհ փողոցի և Արշակունյաց պողոտայի խաչմերուկում բախվել են Երևան քաղաքի Դավիթաշեն թաղամասի բնակիչ, 29-ամյա Միքայել Կիտեսովի վարած «Վազ 2106» մակնիշի 001 ՕՕ 03 համարանիշի և Երևան քաղաքի Արցախի փողոցի բնակիչ, 31-ամյա Հասմիկ Օհանյանի վարած «Պռադո» մակնիշի 71 ՍP 700 համարանիշի ավտոմեքենաները:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով «Պռադոյի» ուղևորուհի՝ 20-ամյա Սիրանույշ Գրիգորյանը, մարմնական վնասվածքներով տեղափոխվել է Էրեբունի բժշկական կենտրոն:

Ֆոտոլրագրողը հայտնում է, որ վթարից հետո երկու ավտոմեքենաների վարորդները մինչև Ճանապարհային ոստիկանության դեպքի վայր ժամանումը մեքենաները հեռացրել էին վթարի վայրից:

Արդեն Ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի հատկապես կարևոր գործերով ավագ քննիչ Արտաշես Վանյանի գլխավորությամբ, Երևանի ՃՈ աշխատակիցները նշված ավտոմեքենաները հայտնաբերել են Վերին Շենգավիթ 2-րդ փողոցում ՝ վճարովի ավտոկանգառի հարևանությամբ:
Ա. Վանյանի հանձնարարությամբ, ավտոմեքենաները տեղափոխվել են Երևանի ՃՈ հատուկ պահպանման տարածք:

Գ. Շամշյանը հայտնում է, որ «Պռադոյի» վարորդ Հ. Օհանյանը աշխատում է «Լունա» գիշերային ակումբի տնօրեն, իսկ վիրավոր Ս. Գրիգորյանը պարուհի է, որն ավելի շատ հայտնի է պարող Սիրուշո անվանումով: Ի դեպ, այսօր պարող Սիրուշոյի ծննդյան օրն է: