ՀՀ ԿԳ նախարար Արմեն Աշոտյանի խոսքը Մարդու իրավունքների միջազգային օրվա կապակցությամբ

Մարդու իրավունքների և ազատությունների շղթայում կարևոր օղակ է անձի կրթության իրավունքը: Սահմանադրորեն ամրապնդված այս իրավունքի կիրառմանը և պաշտպանությանն են ուղղված պետական համապատասխան կառույցների գործունեությունն ու ծրագրերը: Պետության մշտական հոգածության և անմիջական աջակցության շնորհիվ արվում է ամեն ինչ՝ պահպանելու և ամրապնդելու յուրաքանչյուր անհատի ինչպես կրթական իրավունքը, այնպես էլ իրավունքների և ազատությունների ամբողջական ինստիտուտը:

Իրավական այս համակարգի կայացումն ու ամրապնդումը զարգացում և առաջընթաց արձանագրած յուրաքանչյուր պետության հիմնարար սկզբունքն է, իրավական պետության ստեղծման կարևորագույն երաշխիքը:

Օրվա խորհրդանիշը պարտավորեցնող է բոլորիս համար: Ողջունելով հայ հանրությանը Մարդու իրավունքների միջազգային օրվա առիթով' ցանկանում եմ, որ «Հարգիր քո և ուրիշի իրավունքները» սկզբունքը դառնա ուղենիշ և ուղղորդի մեզ հասարակական կյանքի բոլոր ոլորտներում:

Այս առիթով նաև կցանկանայի ընդգծել, որ մարդու իրավունքների կողքին միշտ անհրաժեշտ է դիտարկել նաև մարդկային արժանապատվությունը, բանականությունը և խիղճը, առանց որոնց անհնար է պատկերացնել մարդու, իր իրավունքների, ազատությունների և պատասխանատվության լիարժեք ներդաշնակությունը: