Հայ-գերմանական համաժողով՝ «Կառավարման թափանցիկություն» խորագրով

Դեկտեմբերի 10-ին ՀՀ Ազգային ժողովի նիստերի դահլիճում տեղի ունեցավ «Կառավարման թափանցիկություն» խորագրով հայ-գերմանական համաժողովը, որին մասնակցում էին Աժ պատգամավորներ, ՀՀ-ում Գերմանիայի դեսպանը, նախարարությունների, միջազգային ու հասարակական կազմակերպությունների ներկայացուցիչներ:

Համաժողովի մասնակիցներին ՀՀ Ազգային ժողովի նախագահ Հովիկ Աբրահամյանի ուղերձը ներկայացրեց ԱԺ փոխնախագահ Էդուարդ Շարմազանովը:

«Ողջունում եմ հայ-գերմանական համաժողովի մասնակիցներին: Համաժողովի անցկացումը Երեւանում եւս մեկ անգամ վկայում է Գերմանիայի Դաշնային Հանրապետության եւ հանձինս Գերմանիայի միջազգային համագործակցության ընկերության հետ Հայաստանի Հանրապետության փոխվստահելի եւ արդյունավետ համագործակցության մասին:

Շատ ուրախ եմ, որ այս համաժողովի շարժիչ ուժը Գերմանիայի միջազգային համագործակցության ընկերությունն է, որի հետ Հայաստանի Հանրապետության Ազգային ժողովն ունի փոխգործակցության տարիների պատմություն: Ընդհանուր առմամբ, պետք է նշեմ, որ մեր երկրում Գերմանիայի միջազգային համագործակցության ընկերության ավելի քան 20-ամյա բեղմնավոր գործունեությունն արդյունավետ զարգացող հայ-գերմանական ջերմ հարաբերությունների խոսուն վկայությունն է:

Հարգելի բարեկամներ,

Հայաստանում շարունակական բարեփոխումներ են իրականացվում տարբեր ոլորտներում, որոնք ընթանում են մի շարք երկրների ու միջազգային գործընկեր կառույցների գործնական աջակցությամբ: Չափազանց բարձր գնահատելով նրանց օժանդակությունն ու մեր երկրի զարգացմանը սատարելու պատրաստակամությունը՝ ցանկանում եմ ընդգծել նաեւ մեր հասարակության ակտիվ մասնակցությունը բարեփոխումներին, առանց որի երաշխավորված չէ այդ գործընթացների հաջող ընթացքը:

Շատ կարեւոր է պետություն-հասարակություն, պետություն-մասնավոր հատված, պետություն-միջազգային կառույցներ փոխվստահելի սերտ համագործակցությունը, երբ կողմերի գործողությունները թափանցիկ են ու ընկալելի միմյանց: Հայաստանի Հանրապետության Ազգային ժողովն իր գործունեությամբ ձգտում է ապահովել հենց այդպիսի վստահության ու փոխըմբռնման մթնոլորտ, օրենսդրական դաշտի թափանցիկություն, համագործակցության տարբեր ձեւաչափեր ոչ միայն պետական կառույցների, այլեւ հասարակական, այդ թվում՝ միջազգային կազմակերպությունների հետ:

Համոզված կարող եմ ասել, որ Գերմանիայի միջազգային համագործակցության ընկերության հետ Հայաստանի խորհրդարանի փոխգործակցությունը ջանքերի համատեղման, փորձի փոխանակման ու միջազգային համագործակցության հաջողված օրինակ է:

Հարգելի բարեկամներ,

Այս համաժողովը եւս մի նպաստավոր քայլ կլինի՝ ուղղված Հայաստանի եւ միջազգային կառույցների համագործակցության խորացմանը, կառավարման թափանցիկության արդյունավետության բարձրացմանը, որից կշահեն ե՛ւ մեր պետությունն ու հասարակությունը, ե՛ւ, իհարկե, Հայաստանի առաջընթացով շահագրգիռ մեր միջազգային գործընկերները:

Եւս մեկ անգամ ողջունում եմ բոլորիդ եւ մաղթում արգասաբեր աշխատանք»:

Գերմանական միջազգային համագործակցության (GIZ) ընկերությունը տնտեսական համագործակցության շրջանակներում տարբեր ծրագրերի միջոցով խթանում է արդյունավետ կառավարումը եւ թափանցիկությունը՝ աջակցելով տեղական ինքնակառավարման, հանրային ֆինանսների կառավարման, ինչպես նաեւ իրավական եւ արդարադատության ոլորտներում տեղի ունեցող բարեփոխումների իրականացմանը: Համաժողովի նպատակն է նպաստել շահագրգիռ կողմերի միջեւ տեսանկյունների, փորձի եւ գիտելիքների փոխանակմանը, քննարկել հանրային ֆինանսների կառավարման, տեղական ինքնակառավարման եւ մարզային տնտեսական զարգացման, արդարադատության ոլորտներում Հայաստանի կողմից իրականացվող առանցքային բարեփոխումները եւ մարտահրավերները: