Մենք հիմա ունենք «Դև»-եր. այս օրը զոհվեց Դևը՝ Դավիթ Սարապյանը (տեսանյութ)

Այսօր Ջոն Կիրակոսյանի անվան թիվ 20 դպրոցում տեղի ունեցավ միջոցառում՝ նվիրված Արցախյան ազատամարտի լեգենդար հերոս Դևին՝ Դավիթ Սարապյանին: Դպրոցի ընտրությունը պատահական չէր, քանի որ ազգային հերոսն ավարտել է հենց Ջոն Կիրակոսյանի անվան դպրոցը: 

21 տարի առաջ դեկտեմբերի 10-ին, փայլուն կատարելով մարտական առաջադրանքը, հերոսի մահով Շահումյանի շրջանի Թոդան գյուղի համար մղվող մարտում ընկավ Դավիթ Սարապյանը՝ Դևը:

Դավիթը այն քաջերից մեկն էր, ովքեր ընտրեցին Հայրենիք կոչվող հողակտորի վրա արժանապատիվ ապրելու իրենց իրավունքը: Դավիթն առանց վարանելու նետվեց կենաց-մահու կռիվ մղելու թշնամու դեմ: Հերոսն իր մահով անմահացավ, ապացուցելով, որ ոչինչ և ոչ ոք չի կարող հաղթել ճշմարտության և արդարության համար պայքարող մարդուն, մահը մերժողին:

Նրա մահվան օրվա առթիվ դպրոցի միջոցառումների սրահում էին հավաքվել Դավիթի ժամանակակիցները, դպրոցի աշակերտներն ու ուսուչական կազմը: Միջոցառմանը մասնակցում էր նաև երգիչ-երգահան Դավիթ Ամալյանը և «Կարին» երգի-պարի ազգագրական համույթը: Դավիթի մասին իրենց հուշերը պատմեցին նրա ժամանակակիցները, ընկերները: 

«Հերթական անգամ հիշում ենք և ասեմ, որ մենք հա էլ կհիշենք, պարտադիր չէ նրանց միջոցառումներով հիշել՝ նրանցով միշտ ապրել է պետք: Մեզ պետք են «Դև»-եր, «Դուշմաններ», «Ցուլեր»: Պետք է մտածել, որ պատերազմը չի վերջանում, իսկ խաղաղությունը վաստակում են՝ պատերազմի պատրաստ լինելով, եթե անհոգ լինենք այն մտածմունքով, որ ամեն ինչ նորմալ է, էլի մեր դուռը պատերազմներ կչոքեն:

Վստահ եմ, որ հիմա էլ ունենք «Դև»-եր, ցավոք չեմ ճանաչել նրան, չնայած ինձ համար կռված չճանաչած տղա չկա, պարտադիր չէ՝ կենդանի ժամանակ շփվել ենք, թե չէ: Համոզված եմ, որ մենք հիմա «Դև»-եր ունենք, վատը միշտ էլ աչք է ծակում, բայց իսկապես կարծում եմ, որ մենք հիմա ունենք «Դև»-եր»,- Lurer.com-ի հետ զրույցում ասաց երգիչ-երգահան Դավիթ Ամալյանը: