Հրաչ Քեշիշյանն ու Խորեն Լևոնյանը՝ Խորեն Աբրահամյանի մասին

2004 թվականի դեկտեմբերի 10-ին 74 տարեկանում կյանքից հեռացավ հանճարեղ դերասան, ՀԽՍՀ և ԽՍՀՄ ժողովրդական արտիստ Խորեն Աբրահամյանը: Այսօր Խորեն Աբրահամյանի հիշատակի օրն է:

Նա իր փառահեղ խաղով տպավորվել է Սունդուկյանի անվան դրամատիկական թատրոնի հանդիսատեսի, ինչպես նաև հեռուստադիտողի հիշողություններում՝ «Սարոյան եղբայրներ», «Տերը», «Մենք ենք, մեր սարերը», «Երևանյան օրերի խրոնիկա» և այլ՝ մեր մշակույթի պատմության մեջ մեծ արժեք ունեցող ֆիլմերում կերտած կերպարներով:

Խորեն Աբրահամյանի մասին իր հիշողություններով այսօր կիսվել է ռեժիսոր Հրաչ Քեշիշյանը. «Ես Խորեն Բաբկենիչի հետ կարճ եմ շփվել, ափսոսում եմ, որ այդ ժամանակահատվածում ավելի հաճախ չեմ անհանգստացրել Վարպետին: Պետք է Չարենցի «Նամակներ բանտից» հեռուստատեսային տարբերակը նկարահանեինք... Չեղավ, չհասցրեց... Բախտ եմ ունեցել մի քանի անգամ «Խոր Վիրապի» փորձերին ներկա լինել: Նրանից սովորելու շատ բան կար...»:

Իսկ նրա թոռը՝ տաղանդավոր դերասան, հաղորդավար Խորեն Լևոնյանը, հիշել է պապի մտքերից մեկը. «Տաղանդավորն անում է այն, ինչ կարող է, հանճարն անում է այն, ինչ պետք է...»:

Լուսանկարը՝ Արմեն Աղայանի