Որտեղո՞վ կանցնի 3–րդ համաշխարհային պատերազմի ենթադրյալ ճակատը․ Newsweek (լուսանկարներ)

Ամերիկյան Newsweek ամսագիրը հրապարակել է 3–րդ համաշխարհային պատերազմի բռնկման դեպքում ենթադրյալ ճակատի քարտեզի իր տարբերակը, փոխանցում է «ՌԻԱ Նովոստին»։

«ՆԱՏՕ-ի հյուսիսարևելյան թեւը, որը ներառում է Ֆինլանդիայի հետ սահմանը (ՌԴ–ի հետ - խմբ.), կարող է նոր ճակատը լինել»,- գրում է հրատարակությունը։

Ըստ քարտեզի՝ Եվրոպայում 3–րդ համաշխարհային պատերազմի դեպքում ճակատը կարող է ձգվել Ֆինլանդիայի հետ Ռուսաստանի հյուսիսային սահմանից, անցնել Էստոնիայով, Լիտվայով, Լատվիայով, Շվեդիայով և Լեհաստանով և ավարտվել Դանիայի հետ Գերմանիայի սահմանին։

Ըստ Newsweek-ի՝ Լեհաստանի և Լիտվայի սահմանին գտնվող Սուվալկիի միջանցքը կարող է առանձնահատուկ նշանակություն ունենալ Երրորդ համաշխարհային պատերազմի դեպքում. այստեղ, ինչպես կարծում է ամսագիրը, կարող է տեղի ունենալ կողմերի առաջին բախումը՝ Կալինինգրադի շրջանի և Բելառուսի միջև գտնվելու պատճառով։

Հոդվածում նշվում է, որ ակտիվ ռազմական գործողություններ կարող են ծավալվել նաև Սև և Ազովի ծովերում։ Հարավում, ըստ հրատարակության, Աբխազիայում Ռուսաստանի ամուր դիրքերը կարող են «բարդացնել գործերը» ՆԱՏՕ-ի համար։