Զարուհի Փոստանջյան. «Մադաղիսի գործը կոծկող հիմնական հեղինակներից մեկը Գագիկ Ջհանգիրյանն է»

-Տիկին Փոստանջյան, երկու օրից Մադաղիսի գործը, կարելի է ասել, մտնում է վերջնական փուլ և մեղադրյալների պաշտպանները պետք է ներկայանան պաշտպանական ճառով, ի՞նչ եք ակնկալում:

-Ձեր հարցադրման հետ համամիտ չեմ, որովհետև շուրջ 9 տարի է, ինչ այս գործը ընթանում է, տեղափոխվում է վարչական այս ատյանից այն ատյան և մենք չենք կարող ասել, որ սա վերջնական փուլն է: Վերջնական փուլը կլինի միայն այն ժամանակ, երբ իմ պաշտպանյալները կստանան կրած վնասների արդարացի փոխհատուցում՝ թե բարոյական, թե նյութական, թե ֆիզիկական: Բարոյական վնասների փոխհատուցումը ստանալու դեպքում միայն կհամարենք, որ վերջնական փուլ ենք մտել, և դեռ ավելին՝ մենք կարող ենք արձանագրել վերջնական փուլ, երբ կոծկելու և գործի նախաքննությունը շեղելու մասով իրական մեղավորները նստեն մեղադրյալի աթոռին, իսկ տվյալ դեպքում մենք կարող ենք ասել՝ ևս մեկ անգամ ականատեսն ենք, որ Հայաստանի Հանրապետությունում չի գործում դատական համակարգը և դեռ ավելին՝ ունենք արդարադատություն իրականացնել բացարձակապես անկարող դատարաններ: Ի դեպ, պետք է ասեմ, որ վերջերս ՀՀ կառավարությանը արդեն երկրորդ հարցաշարն է հղել Մարդու իրավունքների եվրոպական դատարանը. շուրջ մեկ տասնյակ հարց, որով ՀՀ կառավարությունը պետք է պատասխան տրամադրի Մարդու իրավունքների եվրոպական դատարանին, թե ինչ է տեղի ունեցել:

Կառավարությունը եթե ճշմարտացի պատասխանի, ապա պետք է ասի, որ իրավապահ մարմինները բացարձակապես  գործել են օրենքից դուրս, կտտանքներով կորզել են ցուցմունքներ, դրանք դրել են մեղադրանքի հիմքում և դեռ ավելին՝ պետք է պատասխան տան հետագայում՝ 2006 թվականին վճռաբեկ դատարանի կողմից արձակված դատական ակտի հետագա ընթացքի համար, իսկ դատական ակտի հետագա ընթացքը տեսնում ենք այսօր. որևիցե կերպ ոչինչ չի փոխվել, նույն իրավապահ մարմինները նույն մեղադրանքը ուղղակի փորձում են առաջ մղել, այս անգամ՝ աճպարարությամբ փոխելով, թե իբրև երկու շարքային զինծառայողների կողմից ծանր մարմնական վնասվածքներ հասցնելու հետևանքով է առաջ եկել մահը:

-Տիկին Փոստանջյան, եթե չեմ սխալվում, ժամանակին Գագիկ Ջհանգիրյանն էր այս գործով դատախազը:

-Այս գործը կոծկելու, շեղելու, իսկական մեղավորներին թաքցնել փորձելու (ինչը այս պահին, կարելի է ասել, հաջողվել է) հիմնական հեղինակներից մեկը նախկին զինվորական դատախազ Գագիկ Ջհանգիրյանն է, ով հավանաբար այսօր էլ ունի որոշակի լծակներ՝ գործի քննության վրա ազդելու համար:

-Տիկին Փոստանջյան, ժամանակին այս հարցով կարծես թե բեկում մտավ, ի՞նչն էր պատճառը, որ նորից թարմացրեցին գործը:

-Նորից եմ ասում, հիմնական պատճառն այն է, որ մեր դատական համակարգը անկարող է իրականացնել արդարադատություն, երկրորդը՝ բազմաթիվ բարձրաստիճան պաշտոնյաներ են ներգրավված այս գործի մեջ, երրորդը՝ մենք բազմիցս ականատես ենք եղել (2004 թվականին նույնպես), որ ՀՀ զինված ուժերի ներկայացուցիչները ներգրավված են լինում քաղաքական գործընթացների մեջ: Հիմնական անձը՝ Իվան Գրիգորյանը, ում վերաբերյալ կային ցուցմունքներ, որ տեսել են, թե ինչպես է նա սպանություն կատարել, ժամանակին ներգրավված է եղել քաղաքական գործընթացների մեջ և հենց այդ անձին քողարկելու, կոծկելու նպատակն է, որ այսօր նաև հանգեցնում է նրան, որ իրական մեղավորները չբացահայտվեն: