ԲՀԿ այլընտրանքացումն ու «ԲԱՄՕ»-ի Հակոբի աներոջ կերպարանափոխումները

ԲՀԿ-ի՝ ընդդիմադիր կամ այլընտրանքային կեցվածքին համահունչ հետաքրքիր կերպարանափոխումներ են գրանցվում նաև այս խմբակցության պատգամավորների շարքերում: Այսպես, ԲՀԿ համամասնական ցուցակով խորհրդարան անցած Վահագն Մախսուդյանը, ով օրենսդիրի փառքին արժանացել է բացառապես իր փեսայի՝ «ԲԱՄՕ» ընկերության սեփականատերերից Հակոբ Մուրադյանի շնորհիվ (Մախսուդյանի դուստրը Մուրադյանի կինն է) ԱԺ նախորդ քառօրյայի ընթացքում անճանաչելիորեն փոխվել էր:

Այս պատգամավորը երբևէ աչքի չի էլ ընկել բոցաշունչ ճառերով, ակտիվությամբ, որևէ մեկը նրան տեսնելիս երբևէ գլխի չի էլ ընկնի, թե այդ՝ անգամ արտաքնապես աչքի չընկնող անձնավորությունը ՀՀ օրենսդիրներից մեկն է: Մինչդեռ նախորդ քառօրյային «Վարչական իրավախախտումների վերաբերյալ» օրինագծի փոփոխությունների քննարկման ժամանակ Մախսուդյանը պարզապես «կրակ էր կտրել»: Պատգամավորը չէր հանդարտվում և արդարադատության նախարար Հրայր Թովմասյանից գրեթե «պատիվ էր պահանջում», թե ինչո՞ւ ապօրինի շինարարություն անողները, կանաչ տարածքներ փչացնողներն ավելի խիստ պատիժների չեն ենթարկվում: Նախարարը բացատրում էր պատգամավորին, որ տուգանքներն այդքան էլ քիչ չեն՝ 50 հազար, 100 հազար, 200 հազար. միջին վիճակագրական քաղաքացու համար սրանք բավական խոշոր գումարներ են, իսկ, ինչպես հայտնի է, ապօրինի շինարարության մեջ մեղադրվում են անգամ սեփական բնակարանի դուռ ու պատուհան փոխողները: Բավական է մարդը մի փոքր շինարարություն սկսի իր տանը, միանգամից հայտնվում են տարաբնույթ տուգանողներն ու տուգանում կամ համաձայնվում «չտուգանել»՝ տուգանքին չզիջող գումարի դիմաց:

Բայց դատելով մարտունեցի մեծահարուստ փեսայի շնորհիվ երևանցի և, ըստ երևույթին, արդեն իրեն պատրիկների խավին դասող պատգամավորի զայրույթից՝ այդ տուգանքը նրա համար չափից ավելի քիչ էր: «Հնարավոր չի՞ խստացնել, թե չէ ի՞նչ է՝ տուգանքը մուծում է ու էլի շարունակում իր շինարարությունը»,– ըստ երևույթին՝ պատգամավորի սիրտը «գիլյոտին» էր ուզում: «Չենք կարող, որովհետև հետագայում եվրոպական դատարաններում պրոբլեմներ կունենանք»,- հանգիստ բացատրում էր նախարարը:

Նման կերպարանափոխումն իսկապես զարմանալի էր, սակայն երբ հետաքրքրվեցինք հիշյալ պատգամավորով, պարզվեց, որ «չուզողությունն ու չկամությունն» այդքան էլ նորություն չեն այս անձնավորության համար: Համագյուղացիներն ավելի շատ զարմացան մեր զարմանքի վրա և պատմեցին, որ Մախսուդյան Վահագին բոլորն են ճանաչում և որ նա այն անձնավորությունն էր, որ տրանսպորտային ճգնաժամի տարիներին, երբ գյուղից շրջկենտրոն՝ Մարտունի փոխադրող տրանսպորտ չկար և բոլորը փորձում էին իրար ձեռք մեկնել ու շրջկենտրոն գնացողներն անպայման համագյուղացի ուսանողներին ու աշխատողներին էլ էին տանում իրենց հետ, Մախսուդի Վահագը (այսպես են նրան կոչում գյուղում) այն մարդն էր, որ ամեն օր գործի էր գնում Մարտունի դատարկ ավտոմեքենայով՝ ուշադրություն չդարձնելով ճանապարհին կանգնած ու ցրտաշունչ ձմռան օրերին մրսող ջահել ուսանողներին: Ի դեպ, խորհրդարանական անցած ընտրություններին Զոլաքարում տեղի ունեցած միջադեպը ևս այս պատգամավորի համախոհներն էին հրահրել. երբ համագյուղացիներին պարտադրել էին ընտրել իրենց թեկնածուին ու ԲՀԿ-ին, վերջիններս հակադարձել էին, թե՝ «էսքան տարի ի՞նչ ենք տեսել նրանից, որ ի՞նչ ընտրենք»:

Իսկ հիմա, ինչպես տեսնում ենք, փեսայի շնորհիվ ԲՀԿ ցուցակ «սողոսկած» նույն անձնավորությունը փորձում է իրեն ընդդիմադիր կամ այլընտրանքային, այսինքն՝ կառավարության օրինագծերին դեմ արտահայտվող պատգամավորի կեցվածք ապահովել՝ ի դեպ, չհասկանալով անգամ, որ իր պահանջներն ու վրդովմունքը տրամագծորեն հակառակ են ժողովրդի շահին: Էլ չենք խոսում արտադրողի շահից՝ հաշվի առնելով այն հանգամանքը, որ ցանկացած՝ նույնիսկ փոքր արտադրություն դնող ու արտադրամաս կառուցողն առաջին հերթին բախվում է հենց ապօրինի շինարարության համար գանձվող տուգանքների հետ: Փաստորեն, եթե կառավարությունը տուրք տա այլընտրանքային-ընդդիմադիր պատգամավորի պահանջներին, ապա հայրենական արտադրողների «մայրիկը» ընդհանրապես հայտնվելու է «խորը սգի» մեջ:

Քանի դեռ վերջնականապես չի հստակեցվել ԲՀԿ մարտավարությունը, նման անակնկալ բացահայտումների երևի թե դեռ շատ ենք ականատես լինելու: Սա պարզապես կերպարանափոխման մի շարքային օրինակ էր այն բանի, թե ինչ է լինում, երբ մարդն արհեստականորեն մի կարգավիճակից անցում է կատարում մեկ այլ կարգավիճակի՝ առանց իրական վաստակ ունենալու: Ի դեպ, Վահագն Մախսուդյանը այն պատգամավորներից մեկն է նաև, ով Երևանում ունենալով սեփական առանձնատուն (բնականաբար, դարձյալ փեսայի շնորհիվ) ամեն ամիս պարտաճանաչորեն նաև պետական բյուջեն է դատարկում՝ ստանալով մարզերից եկող և օրենսդիր աշխատանքի համար Երևանում տուն վարձելու համար պատգամավորներին հատկացվող գումարը:

Ինչպես տեսնում ենք, եթե հաստատվեն Ծառուկյանի նախագահական հավակնությունները (իսկ դրանք դեռ պաշտոնապես չեն հերքվել), կարելի է փաստել, որ ԲՀԿ առաջնորդն ավելի քան յուրահատուկ թիմով է ձգտում նվաճել ժողովրդի համակրանքը:

Լուսինե Կեսոյան