Հույս ունեմ, որ 1.5-2 ամսից լիովին կապաքինվեմ. Մարկ Սաղաթելյան

Շոումեն Մարկ Սաղաթելյանը, ով Հայաստանում վթարի ենթարկվելու հետեւանքով երկու անգամ վիրահատվել էր Երեւանում, այնուհետեւ մեկնել Գերմանիա՝ վիրահատության համար, արդեն տանն է՝ Մոսկվայում, անցնում է վերջնական վերականգնողական կուրսեր: Նա քայլում է ձեռնափայտով, բայց հույս ունի, որ 1 կամ 1,5 ամսից կքայլի առանց ձեռնափայտի: Այս մասին շոումենը հայտնել էր 168.am-ի հետ զրույցում:

–Շատ երկար քննարկվում էր այն վարկածը, որ հետվիրահատական խնդիրները հայաստանյան բժիշկների սխալների արդյունքն են: Հայ բժիշկները սխա՞լ էին թույլ տվել:

–Սխալների մասին խոսել չեմ ցանկանում, դա վիճելի թեմա է: Հայաստանում երկու վիրահատություններից հետո՝ մեջքի վրա էի պառկում՝ առանց շարժվելու կամ թեքվելու հնարավորության՝ ուղիղ 70 օր: Դրանից հետո էլի 1,5 ամիս չէի կարողանում քայլել: Իսկ Գերմանիայում, 5 ժամ տեւած վիրահատությունից հետո, երրորդ օրն արդեն կարողանում էի քայլել: Այսօր արդեն հետվիրահատական 45-րդ օրն է, ես տանն եմ:

–Որոշ բժիշկներ քո ֆեյսբուքյան պատին գրում էին, թե հետվիրահատական խնդիրներն ինքդ քեզ լավ չխնամելու արդյունք են:

-Ես ուշադրություն չեմ դարձնում հիմարությունների վրա: Այս վերջին շրջանում մոդայիկ է դարձել՝ ում եւ ինչ պատահի՝ «քննարկել»: Դրա համար էլ ինձ համար կարեւոր եւ հետաքրքիր չեն, այսպես կոչված, նմանատիպ «քննարկումները»:

-Բժիշկներն ի՞նչ են ասում, ե՞րբ ամբողջությամբ կապաքինվես:

-Դեկտեմբերի 8-ին ես արդեն Մոսկվայում պետք է Ամանորյա մեծ համերգ վարեմ: Դա, ամենայն հավանականությամբ, Հայաստանում՝ «Արմենիա» հեռուստաընկերության եթերում կլինի հունվարին: Ամբողջությամբ ապաքինվելը կախված է օրգանիզմիցս: Հույս ունեմ, որ 1.5-2 ամսից լիովին կապաքինվեմ:

Հիշեցնենք, որ Երեւանի Նալբանդյանի եւ Արամի փողոցների խաչմերուկում հունիսի 22-ին՝ ժամը 01.35-ի սահմաններում վթարի էին ենթարկվել պրոդյուսեր Գրիգոր Նազարյանն ու հաղորդավար, շոումեն Մարկ Սաղաթելյանը: Բախվել էին «Оպել» մակնիշի 30 ՏԼ 173 համարանիշի եւ «Ֆոլքսվագեն» մակնիշի 14 ՏՕ 811 համարանիշի ավտոմեքենաները, ինչի հետեւանքով «Ֆոլքսվագեն»-ի վարորդ՝ 41-ամյա Գրիգոր Նազարյանը եւ ուղեւոր՝ 41-ամյա Մարկ Սաղաթելյանը տեղափոխվել էին թիվ 1 համալսարանական հիվանդանոց, ապա՝ Միքայելյանի անվան վիրաբուժության կենտրոն: Այնուհետեւ Մարկ Սաղաթելյանը տեղափոխվել էր «Էրեբունի» բժշկական կենտրոն, որտեղ վիրահատվել էր նրա կոնքազդրի հոդը: Վթարի ենթարկվելու փաստի առթիվ Ճանապարհատրանսպորտային հանցագործությունների քննության բաժնում նախապատրաստված նյութերով քրեական գործի հարուցումը մերժվել է: