«Թբիլիսիում բողոքի ցույցերի ճնշման ժամանակ բռնությունը հասել է ցնցող մակարդակի»․ Human Rights Watch

Վրաստանի իշխանությունների կողմից խաղաղ ցուցարարների նկատմամբ բռնության մակարդակը երկրի ներքին օրենքների և միջազգային նորմերի ցնցող խախտում էր, ասվում է Human Rights Watch միջազգային իրավապաշտպան կազմակերպության զեկույցում։

Կազմակերպությունը հայտնել է, որ անվտանգության ուժերը «համատարած և հստակ պատժիչ գործողություններ» են կիրառել ցուցարարներին հալածելու համար՝ բռնի կերպով ձերբակալելով և ծեծելով նրանց:

Ոստիկանությունը նաև խոշտանգումների և վատ վերաբերմունքի է ենթարկել ձերբակալվածներին ոստիկանական ֆուրգոններում և ոստիկանական բաժանմունքներում, ասվում է զեկույցում:

Human Rights Watch-ը նշում է, որ զրուցել է տասնյակ մարդկանց հետ, ովքեր ենթարկվել են ոստիկանական բռնության և ստացել վնասվածքներ, այդ թվում՝ ցնցումներ, քթի բազմաթիվ կոտրվածքներ, քերծվածքներ և կապտուկներ ամբողջ մարմնում: