Բելառուսցի վիպագիրը պատմել է Հիլարի Քլինթոնի սիրեկանների մասին

Բելառուսի գրողների միության նախագահ Նիկոլայ Չերգինեցը, ով նաև ղեկավարում է բարոյականության հարցերով հասարակական խորհուրդը, հայտարարել է, թե շատ լավ տեղեկացված է ԱՄՆ-ի պետքարտուղար Հիլարի Քլինթոնի արտաամուսնական կապերի մասին: Նման հայտարարությամբ նա հանդես է եկել TUT.BY-ին տված հարցազրույցի ժամանակ. հայտնում է Lenta.ru-ն:

«Ես շատ լավ գիտեմ Քլինթոնի սիրեկաններին: Նրանցից մեկին օրինակ անվանում էին «մսագործ», քանի որ նա Նյու Յորքի խոշորագույն ռեստորանների ցանցերից մեկի տերն էր: Նրանց նույնիսկ լուսանկարել էին միասին Սպիտակ տան մոտ, որից հետ իբր փորձաքննություն արեցին և ապացուցեցին, որ դա ֆոտոմոնտաժ է եղել»,-հայտարարել է Չերգինեցը:

Չերգինեցը 2002թ. գրել էր իր «Օվալե աշխատասենյակի գաղտնիքը» վեպը, որում պատմում էր ԱՄՆ-ի նախագահներից մեկի սիրային արկածների մասին: Իհարկե, հերոսների դերում հանդես էին գալիս մտացածին անձինք, սակայն հատկանշական է, որ վեպը լույս տեսավ ԱՄՆ-ի նախկին նախագահ Բիլ Քլինթոնի և Մոնիկա Լևինսկու սկանդալային սիրավեպից մի քանի տարի հետո:

TUT.BY-ին տված իր ներկայիս հարցազրույցում հեղինակը նշել է, որ իր գրած վեպի համար հիմք են ծառայել նյութերը, որոնք իրեն տրամադրվել են ամերիկացիների կողմից՝ ի նշան շնորհակալության այն բանի, որ հեղինակը նրանց տեղեկություն է հաղորդել Վիետնամում սպանված ամերիկացի օդաչուի մասին: Օդաչուին, ըստ Չերգինեցի, գտել էին սահմանապահները գետի ափին և յուրացրել նրա ժամացույցն ու փաստաթղթերը: