Ֆլորա Մարտիրոսյան. «Հայտնվելով Աստծո առաջ՝ շնորհակալություն կհայտնեի»

ՀՀ ժողովրդական արտիստ Ֆլորա Մարտիրոսյանի աճյունն այսօր ամփոփվեց  հայրենի հողում` Երևանի քաղաքային պանթեոնում:

Դեռ շատ անելիքներ ու երազանքներ ուներ երգչուհին, սակայն վախենում էր, որ ժամանակի մեջ չտեղավորվի. փաստորեն իրավացի էր: Այդուամենայնիվ նրա ժառանգությունն այնքան մեծ է, որ դեռ երկար, շատ երկար տարիներ մենք կզգանք նրա ներկայությունը իր երգերի, իր արած գործերի պտուղները քաղելու ընթացքում: 

Երբ այս տարի երգչուհին վերջին անգամ եկել էր հայրենիք, նա իր տված հարցազրույցներից մեկում խոսել էր իր ափսոսանքների, հպարտությունների ու երազանքների մասին: Առաջարկում ենք այդ հարցազրույցից փոքրիկ մի հատված, որը հնարավորություն կընձեռի ճանաչել նաև Ֆլորա Մարտիրոսյան կնոջը.

-Օտարության մեջ ապրած տարիները ի՞նչ են փոխել Ձեր մեջ:

-Ինքս չեմ զգում, եթե ուրշները զգում են, թող ասեն:

-Ինչո՞վ եք հպարտանում:

Իմ ընտանիքով ու երեխաներով:

-Հանուն ինչի՞ արժե նորից ծնվել:

Նորից իմ ամուսնուն հանդիպելու, նորից իմ երեխաներին լույս աշխարհ բերելու, և նորից նույն գործերն անելու համար:

-Ինչի՞ համար եք ափսոսում:

-Ափսոսում եմ, որ ժամանակն անցնում է ու գործերը դանդաղ են ընթանում: Կուզենայի որ ժամանակն ավելի շատ լիներ, որ բոլոր գործերը հասցնեինք, և ավելի շատ ծրագրեր իրականացնեինք:

-Ամենահիշարժան օրը Ձեր կյանքում:
-Երբ մայրացա. 1991 թվականի հունիսի 24-ին ծնվեց իմ աղջիկը:

-Մեր քաղաքի ի՞նչն եք սիրում:

-Մեր քաղաքն եմ ընդհանրապես սիրում:

-Ամենակարևորը կնոջ արտաքինում:

-Արտաքնապես կոկիկ լինելը, սակայն միևնույնն է, ամենակարևորը հոգու մաքրությունն է. եթե մարդու հոգին մաքուր է, արտաքինն այնքան էլ էական չէ:

-Ինչի՞ մասին եք մտածում քնելուց առաջ:

-Ամեն ինչի: Միշտ մտածում եմ երեխաներիս առողջության ու ապագայի մասին:

-Հայտնվելով Ատծո առաջ, ի՞նչ կհարցնեիք:

-Չէի հարցնի, այլ շնորհակալություն կհայտնեի, որ ինձ երգելու շնորհ է տվել: Շնորհակալ կլինեի ինձ տված այսքան շնորհի համար ու էլի ուժ կխնդրեի:

-Ինչի՞ մասին եք երազում:

-Օ՜, շատ բաների: Ուզում եմ, որ իմ ամեն մի սկսած գործ հաջողությամբ պսակվի, ամենուր խաղաղություն լինի, մեր ազգի համար ամեն ինչ լավ լինի, ամենուր սեր ու հարգանք լինի:

-Ձեր երջանկության բաղադրատոմսը:

-Սեր, սեր, սեր... 

Նյութը՝ «Նանե» ամսագրի