Դե ֆակտո պատժամիջոցներն արդեն գործում էին. Կոբախիձեն՝ Իվանիշվիլիի դեմ պատժամիջոցների մասին

Վրաստանի վարչապետ Իրակլի Կոբախիձեն, ում լեգիտիմությունը չեն ճանաչում նախագահ Սալոմե Զուրաբիշվիլին և ընդդիմությունը, մեկնաբանել է «Վրացական երազանք» կուսակցության պատվավոր նախագահ Բիձինա Իվանիշվիլիի դեմ ԱՄՆ-ի կիրառած պատժամիջոցները։ Կոբախիձեն նշել է, որ Իվանիշվիլին արդեն դե ֆակտո պատժամիջոցների տակ էր, և այն փաստը, որ այդ միջոցն ընդունվել է, «կարևոր չէ», գրում է Ekhokavkaza-ն։

«Բիձինա Իվանիշվիլին արդեն դե ֆակտո պատժամիջոցների տակ էր։ Հիմա այլևս շանտաժի հիմքեր չկան։ Փաստորեն, ոչինչ չի փոխվել, այնուամենայնիվ, դե ֆակտո պատժամիջոցները գործում էին, քանի որ այդ անձը չի համագործակցել երկրի ազգային շահերի հետ։ Գիտեք, թե ինչպիսին էին մեր մարտահրավերները 2022 թվականին, ինչ էին պահանջում թիմից, Բիձինա Իվանիշվիլիից։ Քանի որ նա չի առերեսվել երկրի առանցքային, հիմնարար շահերին, այդ իսկ պատճառով՝ նախ դե ֆակտո պատժամիջոցներ են մտցվել, իսկ հիմա էական նշանակություն չունեցող որոշում է կայացվել։ Ընդհակառակը, դրանով նրանք կորցրել են շանտաժի գործիքը»,- լրագրողների հետ զրույցում ասել է Կոբախիձեն։

Նա հավելել է, որ վերջերս խոսել է նաև Բիձինա Իվանիշվիլիի հետ։

«Նրա դիրքորոշումը նույնն է, ոչ մի առանձնահատուկ բան»,-ասել է Կոբախիձեն:

Ինչպես հայտնել ենք, ԱՄՆ-ը պատժամիջոցներ է սահմանել Վրաստանի նախկին վարչապետ Բիձինա Իվանիշվիլիի դեմ։ 

«Մենք խստորեն դատապարտում ենք «Վրացական երազանքի» գործողությունները Իվանիշվիլիի գլխավորությամբ՝ ներառյալ վրացիների, ցուցարարների, լրատվամիջոցների ներկայացուցիչների, իրավապաշտպանների և ընդդիմադիրների շարունակական և դաժան ճնշումները», - ասվում է հաղորդագրության մեջ։