Հայաստանի գյուղի և գյուղատնտեսության զարգացման հեռանկարները

Երեկ «Արմենիա Մարիոթ» հյուրանոցում կայացավ Համաշխարհային բանկի և ՀՀ գյուղատնտեսության նախարարության կողմից կազմակերպված «Հայաստանի գյուղի և գյուղատնտեսության քաղաքականության ռազմավարական խթանները» գիտաժողովը:

Այն քննարկեց ՀԲ-ի կողմից մշակված «Գյուղատնտեսության և գյուղական զարգացման քաղաքականության մասին զեկույցը», որն ուղենիշային պետք է լինի Հայաստանի ագրարային ոլորտի առաջիկա զարգացումների քաղաքականության հստակեցման համար:

Գիտաժողովին մասնակցում էին ՀՀ փոխվարչապետ, ՀՀ տարածքային կառավարման նախարար Արմեն Գևորգյանը, ՀՀ գյուղատնտեսության նախարար Սերգո Կարապետյանը, Համաշխարհային բանկի հայաստանյան գրասենյակի տնօրեն Ժան Միշել Հապին, ՀՀ կառավարության, ՀՀ գյուղատնտեսության նախարարության և Համաշխարհային բանկի այլ ներկայացուցիչներ, գյուղի և գյուղատնտեսության զարգացման քաղաքականության հարցերով հրավիրված փորձագետներ:

Բացման խոսքում, Համաշխարհային բանկի հայաստանյան գրասենյակի տնօրեն Ժան Միշել Հապին, հույս է հայտնել, որ. «Այս գիտաժողովը մեծապես կնպաստի Հայաստանի գյուղատնտեսության ոլորտի արդիականացմանն ու միջազգային մրցունակության բարձրացմանն ուղղված քաղաքականության հստակեցմանը»:

Գիտաժողովի մասնակիցներին ողջունել և նրանց արդյունավետ աշխատանք են մաղթել ՀՀ փոխվարչապետ, ՀՀ տարածքային կառավարման նախարար Արմեն Գևորգյանն ու ՀՀ գյուղատնտեսության նախարար Սերգո Կարապետյանը: Կարևորելով քննարկման ներկայացված փաստաթղթի ռազմավարական նշանակությունը՝ ՀՀ գյուղատնտեսության նախարար Սերգո Կարապետյանը մասնավորապես նշել է. «Գյուղատնտեսությունում ծառացած խնդիրների լուծումը պահանջում է ոլորտի կայունացման քաղաքականությունից զարգացման քաղաքականության անցում, որի ելակետային գործընթացում առանձնակի գնահատվում է Համաշխարհային Բանկի աջակցությունը, մասնավորապես «Գյուղատնտեսության և գյուղական զարգացման քաղաքականության զեկույցի մշակումը», ինչպես նաև «Հայաստանի գյուղի և գյուղատնտեսության զարգացման քաղաքականության ռազմավարական խթանները» խորագիրը կրող տվյալ գիտաժողովի անցկացումով:

Գիտաժողովում գյուղի և գյուղատնտեսության զարգացման ռազմավարական մոտեցումների և Համաշխարհային բանկի հաշվետությունների եզրահանգումների մասին զեկուցումներով հանդես են եկել ՀԲ-ի շրջակա միջավայրի և սոցիալական կայուն զարգացման բաժնի ղեկավար Ահմեդ Էյվեյդան, ՀԲ–ի գյուղատնտեսության հարցերով տնտեսագետ Իրինա Ռամնիչեանուն, Վարշավայի համալսարանի տնտեսական գիտությունների բաժանմունքի պրոֆեսոր Իրժի Վիլկինը և այլք: