ՀՀ գյուղնախարարը հանդիպել է Անտոնիո Ալոնզիի հետ

ՀՀ գյուղատնտեսության նախարար Սերգո Կարապետյանն ընդունել է պաշտոնական այցով Երևանում գտնվող ՄԱԿ-ի Պարենի եւ գյուղատնտեսության կազմակերպության Հայաստանի նորանշանակ ներկայացուցիչ, Եվրոպայի և Կենտրոնական Ասիայի տարծաշրջանային ներկայացուցչի տեղակալ Անտոնիո Ալոնզիին։

Նախարարը շնորհավորել է Անտոնիո Ալոնզիին՝ նման պաստասխանատու պաշտոն ստանձնելու առթիվ: Խոսելով ՊԳԿ-ի կողմից Հայաստանի գյուղատնտեսության ոլորտում իրականացված ծրագրերի մասին, նախարարն առանձնապես կարևորել է վերջին երկու տարիների համագործակցությունը, հույս հայտնելով, որ առաջիկայում այն ավելի արդյունավետ կդառնա:

Անդրադառնալով իրականացվող և նախատեսվող ծրագրերին, Սերգո Կարապետյանն Անտոնի Ալոնզիի ուշադրությանն է ներկայացրել Հայաստանի գյուղատնտեսության զարգացման համար առանձնակի կարևորություն ունեցող այն հիմնահարցերը, որոնց լուծման մեջ ՀՀ գյուղատնտեսության նախարարությունն ակնկալում է ՊԳԿ-ի օժանդակությունը: Նախարարը մասնավորապես առանձնացրել է սպանդանոցների կառուցման, գյուղատնտեսական կոոպերատիվների ստեղծման, ջրային ռեսուրսների նպատակային օգտագործման, ծիրանի և խաղողի գենետիկ սորտերի պահպանման և օգտագործման, գյուղատնտեսական մթերքի իրացման շուկաների կազմակերպման ծրագրերին օժանդակելու հրատապությունը:

Շնորհակալություն հայտնելով ընդունելության համար և հավաստիացնելով, որ պատրաստ է հնարավորինս նպաստել ՊԳԿ-ի կողմից Հայաստանում իրականացվող ծրագրերի իրականացմանը, պարոն Ալոնզին խնդրել է հնարավորինս արագ և մանրամասն հիմնավորումներ տրամադրել վերոնշյալ հիմնահարցերի վերաբերյալ, դրանք կազմակերպության քննարկմանը ներկայացնելու համար:

Հանդիպման ավարտին կողմերը ստորագրեցին ՊԳԿ-ի և ՀՀ գյուղատնտեսության նախարարության համագործակցության մասին ևս մի փաստաթուղթ՝ Ժամկետանց թունաքիմիկատների վերացման և կանխարգելման ծրագրի իրականացման վերաբերյալ համաձայնագիրը: