Ադրբեջանը և Թուրքիան՝ բանտերում ամենաշատ լրագրողներ ունեցող երկրների ցուցակում

«Լրագրողների պաշտպանության կոմիտե»-ի` (Committee to Protect Journalists, CPJ) երեքշաբթի օրը հրապարակված զեկույցի համաձայն՝ 2012 թվականին աշխարհի տարբեր երկրներում հիմանականում կեղծ մեղադրանքներով ազատազրկման մեջ է 232 մարդ (լրագրողների ռեկորդային թիվ), հաղորդվում է կազմակերպության կայքում, փոխանցում է РИА Новости-ն:

Այս ցուցանիշը զգալիորեն աճել է 2011 թվականի համեմատ, երբ, CPJ-ի տվյալներով, ամբողջ աշխարհի բանտերում կար 179 լրագրող: Զեկույցի համաձայն՝ 2012-ին հիմնական միտում է նկատվում այն լրագրողների ձերբակալության, որոնք մեղադրվում են ազգի դավաճանության, ահաբեկչության և վնասակար գործունեության մեջ: Ընդ որում՝ իշխանության ամենաթողության զոհ են դառնում հավասարարպես և ավանդական ԶԼՄ-ների լրագրողները, և առցանց մեդիա ռեսուրսների լրագրողները:

Ամենաբարձր ցուցանիշը գրանցվել է Թուրքիայում, Իրանում և Չինաստանում: Տարբեր մեղադրանքներով, այդ թվում՝ նաև ծանր հանցագործությունների, այս երկրներում անազատության մեջ է համապատասխանաբար 49, 45 և 32 լրագրող: Բացի այդ, ցուցակում ներառվել են Սիրիան, Վիետնամը, Ադրբեջանը, Եթովպիան, Ուզբեկստանը և Սաուդյան Արաբիան: