ՆԱՏՕ-ն գնահատում է ՀՀ ԱԻՆ ձեռքբերումները

Դեկտեմբերի 10-ին Բրյուսելում՝ ՆԱՏՕ-ի շտաբկայանում, տեղի ունեցավ աննախադեպ մի հանդիպում ճկուն ձևաչափով. ՆԱՏՕ-ի անդամ 28 երկրները՝ դեսպանների մակարդակով, Հայաստանի գործընկեր երկրների հետ հանդիպեցին ՀՀ ԱԻ նախարար Արմեն Երիցյանին: Քննարկման թեմաներն Աղետների ռիսկի նվազեցման ոլորտում Հայաստանի ձեռքբերումներն էին ու առաջացած կարիքները՝ կենտրոնանալով ճգնաժամային կառավարման կենտրոնի վրա:

Մինչ հիմնական հանդիպումը, Արմեն Երիցյանին ընդունեց ՆԱՏՕ-ի գլխավոր քարտուղարի գործողությունների գծով ներկայացուցիչ, դեսպան Սթիվեն Էվանսը, որն աջակցում է Հյուսիս-Ատլանտյան Խորհրդին ու գլխավոր քարտուղարին ՆԱՏՕ-ի քաղաքական ուղղություններում և իրականացնում գործառնական գործողությունների կառավարում: Ընդունելությանը ներկա էր նաև Եվրաանտլանտյան աղետների արձագանքման համակարգման կենտրոնի (EADRCC) տնօրեն Գյունտեր Բրետշնայդերը: Դեսպան Էվանսը բարձր գնահատեց Հայաստանի ներդրումն ու զգալի առաջընթացն աղետների ռիսկի նվազեցման և արձագանքման ոլորտում, նրա ակտիվ մասնակցությունը ՆԱՏՕ-ի կազմակերպած միջոցառումներին: Պարոն Էվանսը հատուկ շեշտեց Հայաստանում կազմակերպված «Արմենիա 2010» ուսումնավարժության բարձր մակարդակը:

ԱԻ նախարարը հակիրճ ներկայացրեց կատարած աշխատանքն ու բոլոր ուղղություններով համագործակցության, ՆԱՏՕ-ի անդամ ու գործընկեր երկրների հետ գործակցության իր տեսլականը: Նա հույս հայտնեց, որ Հայաստանն առավել ակտիվորեն կներգրավվի աղետների արձագանքման միջազգային գործողություններում:

Դեսպան Էվանսը հաջողություն մաղթելով Արմեն Երիցյանին, վստահություն հայտնեց, որ անընդհատ իր ներուժը հզորացնող Հայաստանի ԱԻ նախարարությունը, նաև ՆԱՏՕ-ի աջակցությամբ, իր լուրջ ներդրումը կունենա ոչ միայն ԱՌՆ, այլև արձագանքման գործողություններում:

Ընդունելությունից հետո սկսվեց հանդիպումը: Բացման խոսքում դեսպան Ֆրանչեսկա Տարդիոլին, ով պատասխանատու է Դաշինքի քաղաքացիական-ռազմական պլանավորման, ճգնաժամային կառավարման քաղաքականության ու գործառույթների, բարձր մակարդակի քաղաքական-ռազմական վարժանքների համար, նշեց, որ Հայաստանը լուրջ առաջընթաց է արձանագրել աղետների ռիսկի նվազեցման և արձագանքման, մասնավորապես' ճգնաժամային կառավարման ոլորտում, սակայն, ինչպես բոլոր զարգացող երկրները, ստիպված է հաղթահարել տնտեսական ու ֆինանսական լուրջ խոչընդոտներ: Մինչև նախարար Արմեն Երիցյանին խոսք տրամադրելը՝ նա մեկ անգամ ևս ՆԱՏՕ-ի անունից հավաստիացրեց, որ անպայմանորեն աջակցելու են Հայաստանին իր նախաձեռնություններում:

Արմեն Երիցյանը ներկայացրեց Հայաստանի ԱԻ կառավարման համակարգը, նրա զարգացման փուլերը, ԱՌՆ ոլորտում ձեռքբերումները, միջազգային արձագանքներն ու գնահատականները, ՆԱՏՕ-ի հետ համագործակցության փորձն ու սերտած դասերը, վաղվա տեսլականը: Կարևոր ուղերձն այն էր, որ Հայաստանն ունի իր հստակ պատկերացումներն արձանագրված թերությունների, կարիքների և վաղվա օրը մոտեցնելու ուղիների ու քայլերի մասին, վաղ թե ուշ կյանքի է կոչելու աղետակայուն երկիր ու աղետակայուն համայնք տեսլականը, իսկ միջազգային հանրության աջակցությունը Հայաստանի հզորացած ներուժը կարող է ծառայեցնել հենց միջազգային գործողությունների արդյունավետության բարձրացմանը:

Նախարար Երիցյանի զեկույցին հաջորդեց ԱԻՆ գործունեությունը ներկայացնող տեսահոլովակը, որից հետո նախարարին ուղղվեցին հարցեր, իսկ ավելի շատ հիացմունքի, գովեստի, խրախուսանքի ու երախտագիտության խոսքեր: ԱՄՆ-ի, Շվեյցարիայի, Ռուսաստանի և այլ երկրների ներկայացուցիչները դրվատանքից զատ նաև համոզմունք հայտնեցին, որ ՀՀ ԱԻՆ-ը հուսալի գործընկեր է, և իրենք պատրաստ են շարունակել ու խորացնել համագործակցությունը: Պայմանավորվածություն ձեռք բերվեց Հայաստանի ներկայացրած կարիքների ցանկի մանրամասն քննարկումից հետո յուրաքանչյուր երկրի հետ համագործակցել առանձին ծրագրերով:

Նիկոլայ Գրիգորյան, ԱԻՆ ՓԾ տնօրենի տեղակալ

Բրյուսել, ՆԱՏՕ-ի շտաբկայան