Էռնեստ Դուլգարյանը՝ կոմպոզիտորների միջազգային մրցույթի հաղթող

ՀՀ մշակույթի նախարարության աջակցությամբ՝ 2012 թ. ամռանը երիտասարդ կոմպոզիտոր Էռնեստ Դուլգարյանը մասնակցել է Սանկտ-Պետերբուրգում կայացած Յու. Ֆալիկի անվան կոմպոզիտորների միջազգային մրցույթին և արժանացել 1-ին մրցանակի: 2-րդ մրցանակին արժանացել է Ռուսաստանի ներկայացուցիչ Արթուր Վաբելը, 3-րդ մրցանակին՝ Ուկրաինայի ներկայացուցիչ Լյուդմիլա Սամոդաևան: Ընդհանուր առմամբ, մրցույթին ներկայացվել է 73 ստեղծագործություն' 16 երկրից: 2012 թ. նոյեմբրի 4-ին Սանկտ-Պետերբուրգի կոմպոզիտորների տան համերգասրահում տեղի է ունեցել Յու. Ֆալիկի անվան կոմպոզիտորների միջազգային մրցույթի գալա համերգը և մրցանակների հանձնման հանդիսավոր արարողությունը: Համերգը կայացել է «Պետերբուրգյան աշուն» միջազգային 11-րդ փառատոնի շրջանակում: Համերգային ծրագրում Սանկտ-Պետերբուրգի թավջութակահարների անսամբլի կատարմամբ հնչել են Յու. Ֆալիկի անվան կոմպոզիտորների միջազգային մրցույթի մրցանակակիրների ստեղծագործությունները, այդ թվում, Էռնեստ Դուլգարյանի թավջութակների համար գրված «Չակոնա» դասական ստեղծագործությունը: Էռնեստ Դուլգարյանը Սանկտ-Պետերբուրգի թավջութակահարների անսամբլից երկարատև համագործակցության առաջարկ է ստացել և առաջիկայում նախատեսվում է երիտասարդ կոմպոզիտորի նոր ստեղծագործության պրեմիերան:

Էռնեստ Դուլգարյանը 2012 թ. գերազանցությամբ ավարտել է Երևանի Կոմիտասի անվան պետական կոնսերվատորիայի կոմպոզիցիայի բաժինը, այժմ սովորում է նույն բուհի մագիստրատուրայում: Նա եղել է անվանի կոմպոզիտոր Էդվարդ Միրզոյանի սանը: