«ՉԻ». Մենաշնորհը մտել է նաև Հայաստանի պետական ֆիլհարմոնիկ նվագախումբ

Վերջին շրջանում հայաստանյան դասական երաժշտության ոլորտում ակտիվորեն լուրեր են շրջանառվում, թե ժամանակն է վերջապես լուծելու պետական ֆիլհարմոնիկ նվագախմբի գլխավոր դիրիժորի փոփոխության խնդիրը: Հայտնի դաշնակահար Արմեն Բաբուխանյանի կարծիքն այս հարցում միանշանակ է՝ Էդուարդ Թոփչյանը պետք է փոխարինվի, և դա պետք է արվեր դեռ տարիներ առաջ:

- Պարոն Բաբախանյան, վերջին շրջանում շատ է խոսվում Հայաստանի պետական ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանի մոտալուտ պաշտոնանկության մասին: Ձեր տեսակետն այդ խնդրի վերաբերյալ:

-Ես չեմ ցանկանում մեկնաբանել այն, ինչ խոսվում է: Կասեմ իմ կարծիքը. այդ հարցը վաղուց է հասունացել: Հայաստանի ֆիլհարմոնիկ նվագախումբն արժանի է նորմալ, պրոֆեսիոնալ զարգացման, իսկ պրոֆեսիոնալ զարգացումը Էդուրադ Թոփչյանի հետ անկարել է: Դա ինձ համար՝ որպես երաժշտի, փաստ է: Մեր թիվ մեկ՝ ֆիլհարմոնիկ նվագախմբին միանշանակ պետք է նոր և շատ առողջ ղեկավար: Միջազգային պրակտիկայում ընդունված է, որ դիրիժորները փոխվում են ամենաշատը 5 տարին մեկ: Նույնիսկ լավ երաժիշտը պետք է փոխարինվի, որովհետև նվագախմբին միշտ պետք են նոր ուժ, նոր մտքեր, նոր ուղեցույցներ, իսկ Հայաստանի պետական ֆիլհարմոնիկ նվագախմբում դա չի կատարվում արդեն 11-12 տարի: Եվ այն, ինչ ես ասում եմ, ինձ համար պարզ էր արդեն Թոփչյանի նշանակումից 1-2 տարի անց: Ինքս այդ մասին բավականին հաճախակի եմ բարձրաձայնել: Մոտ 10 տարի ես Հայաստանի պետական ֆիլհարմոնիկ նվագախմբի հետ ընդհանրապես ելույթ չեմ ունեցել մեկ պատճառով՝ սա իմ պրոցեսն է դեպի այն, ինչ կատարվում է: Ինձ համար միանշանակ Էդուարդ Թոփչյանը պետք է հեռանա պաշտոնից, և դա պետք է լիներ առնվազն 8 տարի առաջ:

-Ի՞նչն է պատճառը, որ Թոփչյանը նոր մտքեր, թարմ ուղեցույցներ, ինչպես Դուք ասացիք, չի ցանկանում ներմուծել նվագախումբ: Գուցե հնարավորություննե՞րն են սուղ:

- Բնականաբար, ցանկանում է: Պարզապես ցանկության հետ պետք է լինի նաև կարողություն: Ցանկություն Թոփչյանն ունի, ինքը սիրում է երաժշտությունը, բայց միայն երաշժտություն սիրել է բավարար չէ: Ես աշխատել եմ, ելույթ եմ ունեցել թե՛ երիտասարդ, թե՛ մեծ, թե՛ միջին օղակի դիրիժորների հետ ու շատ լավ հասկանում եմ՝ երբ կա ցնկություն և կարողություն: Եթե ևս մեկ անգամ ելույթ ունենայի Էդուարդ Թոփչյանի հետ (տարիներ առաջ ունեցել եմ ելույթներ), երկրորդ անգամ, թերևս, չէի համաձայնի նրա հետ համագործակցել:

-Ինչո՞ւ

-Որովհետև ինձ համար պրոֆեսիոնալիզմն առաջին տեղում է, իսկ Թոփչյանի մոտ ես դա չեմ տեսնում: