Դասընթացներ ու վարժանքներ` Երևանում և Գյումրիում

ՀՀ արտակարգ իրավիճակների նախարարությունը շարունակում է Սպիտակի 1988 թ. երկրաշարժի 24-րդ տարելիցին նվիրված և բնակչության սեյսմիկ պաշտպանությանն ուղղված միջոցառումները:

«Հայաստանի Երևան և Գյումրի քաղաքներում սեյսմիկ պաշտպանության վարքականոնների ուսուցում և վարժանքներ» ծրագրի շրջանակներում վերջին 3 ամսվա ընթացքում անցկացվել են բազմաթիվ դասընթացներ և ուսումնական տարհանումներ։ Դասընթացները վարել են ՀՀ ԱԻՆ Սեյսմիկ պաշտպանության ծառայության մասնագետները։
Այս ընթացքում Երևանի 14 և Գյումրու 5 դպրոցներում կազմակերպված միջոցառումներին ընդգրկվել է 2300 աշակերտ և 171 ուսուցիչ:

Սեյսմիկ պաշտպանության թեմաներով աշխատանքային քննարկումներ են կազմակերպվել Շիրակի մարզում' Գյումրիի և Մարալիկի քաղաքապետարաններում, ինչպես նաև Ախուրյանի ու Ազատանի համայնքապետարաններում։ Հանդիպումներին մասնակցել են ՀՀ ԱԻՆ «ՍՊԱԾ» գործակալության, Փրկարար ծառայության մարզային վարչության, ԱՌՆԱՊ հիմնադրամի, Շիրակի մարզպետարանի և համայնքապետարանների պատասխանատու աշխատակիցներ։

Քննարկման հիմնական թեմաներն էին'
• ՀՀ-ում գործող օրենքներն ու կարգերը, որոնք կարգավորում են նոր շենքերի նախագծումն ու շինարարությունը, դրանց ուժեղացումը և շահագործումը.
• Գյումրի և Մարալիկ քաղաքների սեյսմիկ ռիսկի գնահատման արդյունքները.
• գյուղական համայնքներում սեյսմիկ ռիսկի վրա ազդող գործոններն ու ռիսկի նվազեցման հիմնական քայլերը
• համայնքապետարանների դերը սեյսմիկ ռիսկի կառավարման գործում։

***
2012 թ. դեկտեմբերի 17-ին, ժամը 10.00-ից սկսած Երևանի Լ. Միրիջանյանի անվան թիվ 155 հիմնական դպրոցում անցկացվելու է սեյսմապաշտպանության վարքականոնների ուսուցում, այնուհետև' աշակերտների և դպրոցի անձնակազմի տարհանում: Դպրոցի հասցեն է՝ ք. Երևան, Աջափնյակի 15-րդ թաղամաս, Բաշինջաղյան փողոցի 2-րդ նրբանցք:

Հաջորդ օրը՝ դեկտեմբերի 18-ին, ժամը 10.30-ից սկսած Գյումրիի Մ. Նալբանդյանի անվան թիվ 11 միջնակարգ դպրոցում նույնպես անցկացվելու է սեյսմապաշտպանության վարքականոնների ուսուցում, իսկ այնուհետև' աշակերտների և դպրոցի անձնակազմի տարհանում: Դպրոցի հասցեն է՝ ք. Գյումրի, Արամ Խաչատրյան 27:

Միջոցառումների հիմնական նպատակն է դպրոցներում բարձրացնել երկրաշարժերի և դրանց վերաբերյալ անվտանգության վարքականոնների մասին իրազեկվածությունը։