«Ըտենց հերյուրանք ու զրպարտանք կյանքում չէի տեսել». Ալիկ Սարգսյան

Արարատի նախկին մարզպետ Վարդգես Հովակիմյանը, ով կանգնած է դատարանի առաջ՝ պաշտոնեական լիազորությունները չարաշահելու համար, դատարանում հայտարարել է, որ Արարատի նախկին մարզպետներից Ալիկ Սարգսյանը գրպանել է 2007 թվականին մարզպետարանի վերանորոգմանը հատկացված գումարն ու ուղղել Արտաշատ քաղաքի կենտրոնում գործող և Ալիկ Սարգսյանին պատկանող «Նոր Արտաշատ» ռեստորանային համալիրի կառուցմանը:

Lragir.am-ը լրատվամիջոցը Ալիկ Սարգսյանից փորձել է պարզել, թե ինչ յուրացումների մասին է խոսքը:

Պարոն Սարգսյան, Վարդգես Հովակիմյանը ձեզ մեղադրում է մարզպետարանի գումարները գրպանելու մեջ, ինչպե՞ս կմեկնաբանեք սա:

Իմ կյանքում լսած բոլոր անհեթեթություններից ամենագունավոր ու անտաղանդ եզրակացությունն է: Ըտենց հերյուրանք ու զրպարտանք կյանքում չէի տեսել: Էդ իմ համար լրիվ նորություն էր:

Բայց ինչո՞ւ է նախկին մարզպետը հենց գումարներ յուրացնելու մեջ ձեզ մեղադրում:

Էս իրան կարաք հարցնեք, բայց աշխարհը գիտի, որ ես այն մարդն եմ, որ պետական փողի մի կոպիկին ես չեմ կպնի ու չեմ կպել երբևէ: Էն ինչ որ վերաբերվում ա պետական գումարին, կյանքում իմ մոտ ըտենց խնդիր չի եղել, դա պրինցիպիալ հարց ա իմ մոտ: Ընենց որ, իզուր ա ու չնչին էդ մարդկանց տառապանքները:

Ի վերջո ի՞նչն է այդքան թշնամացրել ձեզ ու Վարդգես Հովակիմյանին, տևական ժամանակ է՝ միմյանց հասցեին մեղադրանքներ եք հնչեցնում:

Ես ոչ մի բան չեմ ուզում ասեմ, ես ընդհանրապես էդ թեմայի հետ առնչություն չունեմ, այնքանով կապ ունեմ, ինչքան դուք:

Բայց «Նոր Արտաշատ» ռեստորանը ձեզ է պատկանում, ի՞նչ գումարներով է այն կառուցվել:

Ախպերս ա ընդեղ, ինչ ասեմ, ասեմ՝ կապ էլ չունեմ, մեկ ա, չեք հավատալու: Ախպերներս են զբաղվում դրանում, իրավունք ունե՞ն, թե չէ, նրանց սեփականությունն ա: Եթե իրավունք չունեն, էդ ուրիշ:

2007 թվականին մարզպետարանի վերանորոգմանը հատկացված գումարն ամբողջությամբ իր նպատակի՞ն է ծառայել:

Չգիտեմ ինչ գումարների մասին ա խոսքը, ի սեր Աստծո: Չգիտեմ, էդքան տարի անցել ա մարզպետ աշխատելուց: Բայց մի բան գիտեմ ինձ ճանաչելով, որ եթե մարզպետարանին գումար ա հատկացված եղել, ուրեմն ուղիղ 100 տոկոսով ծառայել ա բուն նպատակին: