«Առավոտ». Լևոն Տեր-Պետրոսյանի քաղաքագիտական վերլուծությունը սկսեց աշխատել

Երեկ «Բարգավաճ Հայաստան» կուսակցությունը վերջապես հրապարակեց իր՝ այդքան երկար սպասված որոշումը 2013-ի նախագահական ընտրությունների վերաբերյալ ի հեճուկս կամ ի արդարացումն որոշ քաղաքական ուժերի, անհատների՝ ԲՀԿ առաջնորդը որոշեց չմասնակցել նախագահական ընտրություններին: «Առավոտի» ունեցած տեղեկություններով՝ երեկ ՀԱԿ քաղխորհրդի նիստը բավականին աշխույժ մթնոլորտում է անցել: Քաղխորհրդի անդամները ոգևորված են ԲՀԿ-ի սույն կեցվածքից: ՀԱԿ-ում համարում են, որ ԲՀԿ-ի «ԱԽՔ-ացման» վտանգն այսպիսով վերանում է, և առաջին նախագահ Լևոն Տեր-Պետրոսյանի առաջադրման համար «կանաչ լույս» է վառվում, քանի որ Գագիկ Ծառուկյանի սույն որոշումը բացառում է նաև Վարդան Օսկանյանի առաջադրումը: Հուսով են՝ հիմնական պայքարն ընթանալու է ՀՀ առաջին և երրորդ նախագահների միջև, և որ ԲՀԿ-ի չորս հարյուր հիսունչորս հազար վեց հարյուր յոթանասուներեք ընտրողների մեծամասնությունը կկողմնորոշվի դեպի առաջին նախագահը:

«Լևոն Տեր-Պետրոսյանի քաղաքագիտական վերլուծությունը սկսեց աշխատել»,- այս կարծիքին են ՀԱԿ-ում ու ոգևորությամբ սպասում են դեկտեմբերի 22-ին տեղի ունենալիք ՀՀՇ համագումարին՝ գրեթե վստահ, որ հենց այդ օրն առաջին նախագահը կհայտարարի նախագահական ընտրություններում իր առաջադրման մասին: ՀՀ երկրորդ նախագահի վերադառնալու գործոնը, գոնե այս ընտրություններում, ՀԱԿ-ում բացառում են: Երեկ «Առավոտին» չհաջողվեց այս ամենի վերաբերյալ պաշտոնական մեկնաբանություններ ստանալ: ՀԱԿ խորհրդարանական խմբակցության անդամների հեռախոսները կամ անջատված էին, կամ նրանք չէին պատասխանում հեոախոսազանգերին: