«Ժողովուրդ». ՀԱԿ-ն ընտրություններին կգնա իր թեկնածուով. Գուրգեն Եղիազարյան

Երբ ԲՀԿ մամուլի ծառայությունը տեղեկություն տարածեց, որ ԲՀԿ-ի նախագահ Գագիկ Ծառուկյանը չի առաջադրելու իր թեկնածությունը և ոչ մի թեկնածուի չի սատարելու, ՀԱԿ-ը ստանձնեց ԲՀԿ-ի դերը՝ իմանալ չհայտնելու մասով: Կոնգրեսից ոչ ոք լրատվամիջոցների հետ չէր խոսում, ոչ ոք հստակ դիրքորոշում չէր արտահայտում: Միայն ՍԴՀԿ անդամ, ՀԱԿ ներկայացուցիչ Գուրգեն Եղիազարյանը համաձայնեց պատասխանել «Ժողովուրդ»-ի հարցերին:

- Պարոն Եղիազարյան, արդեն քանի ամիս է՝ ամբողջ քաղաքական դաշտը շունչը պահած սպասում էր Գագիկ Ծառուկյանի հայտարարությանը նախագահական ընտրություններին մասնակցելու մասին: Ի վերջո, այդ հայտարարությունը եղավ, որին ՀԱԿ-ը չէր սպասում: Այսքանից հետո ի՞նչ է անելու Կոնգրեսը:

- Շատ դժվար է Հայաստանի պես երկրում գնալ բռնապետի դեմ, դա շատ դժվար հարց է, հանաք-մասխարություն չէ: Հիմա եթե Դուք ինձ հարցնեք, թե ես մեղադրում եմ Գագիկ Ծառուկյանին, ապա կասեմ՝ իհարկե չեմ մեղադրում, որովհետև այստեղ անմիջապես գործի կանցնեն, և այլ մեթոդներ կկիրառվեն: Հիշեք, որ սա Հայաստանն է, ես հո Եվրոպայի՞ց չեմ եկել, որ հրճվանք ապրեմ սրանց ժողովրդավարությունից: Էս ամեն ինչը հիմարություն է, նման բան չկա:

- Այսինքն՝ ըստ Ձեզ, ճնշումները ազդեցի՞ն, որպեսզի Ծառուկյանը նման որոշում կայացնի ու իրեն հեռու պահի «բռնակալից»:

- Չեմ կարող ասել՝ վախից ելնելով կամ էս ու էն դրույթով, ուղղակի ես Ձեզ տեղեկացնում եմ, թե մենք որտեղ ենք ապրում: Ես ուղղակի հիշեցնում եմ, թե մենք ինչ երկրում ենք ապրում: Ձեզ ավելին ասեմ, հիշո՞ւմ եք, թե անցած նախագահական ընտրություններում, բացի հիմնական թեկնածուներից, քանի հոգի կային: 7-8 հոգի դրել էին, այս անգամ 10-15 հոգի կդնեն, որպեսզի որպես խամաճիկներ՝ ինչ-որ ձայներ հավաքեն: Բայց գիտեք, որ այդ խամաճիկներին իրենց տան անդամներն անգամ ձայն չեն տա: Մենք նման երկրում ենք ապրում, եթե էս պարագայում ԲՀԿ-ն որոշեց սեփական թեկնածուով չգնալ, ապա ես այդտեղ ոչ մի վատ բան չեմ տեսնում: Ես հաստատ գիտեմ, որ մենք մեր թեկնածուով ենք ընտրություններին մասնակցելու:

- Բոլորին հայտնի է, որ ՀԱԿ-ն անհամբեր սպասում էր, թե ԲՀԿ-ն ինչ որոշում է կայացնելու, ու հիմնականում վստահություն կար, որ ԲՀԿ-ն ՕԵԿ «չի դառնա» ու ընդդիմադիր կեցվածքը կպահի: Սակայն այսօր այլ իրականություն եղավ Կոնգրեսն ի՞նչ է անելու:

- ՀԱԿ-ը ոչ մեկից ոչ մի բան չէր սպասում, ես իմ անձնական կարծիքն եմ ասում ու նորից պնդում՝ ՀԱԿ-ն ընտրություններին կգնա իր թեկնածուով: Իհարկե, կան նաև մարդիկ, որոնք ասում են, թե պետք է բոյկոտել ընտրությունները, քանի որ սրանք արդեն գումարները պատրաստել են, որպեսզի իրենց ուզած թվերը նկարեն, դա արդեն պարզ երևում է իրենց գործունեությունից:

-Հիմա ՀԱԿ-ը դավաճանած չի՞ զգում իրեն, քանի որ ՀԱԿ-ԲՀԿ «սիրավեպն» այդպես էլ լավ ավարտ չունեցավ:

Ինչի՞ պետք է ՀԱԿ-ն իրեն դավաճանած զգա, երբ որ ես միշտ ասել եմ՝ մենք պատրաստ ենք համագործակցել ցանկացածի ուժի հետ, որը մտահոգված է հայ ժողովրդի ապագայով, իր երկրի կայացմամբ: