«ՀԺ». Կոալիցիան չեն բացառում

ԲՀԿ նախագահ Գագիկ Ծառուկյանի «հաջորդ դասը», որին այդքան սպասում էին քաղաքական ուժերը, ավարտվեց երկու նախադասությամբ՝ գալիք նախագահական ընտրություններում ԲՀԿ-ն չի առաջադրելու սեփական թեկնածու, գալիք նախագահական ընտրություններում ԲՀԿ-ն չի սատարելու թեկնածուներից որևէ մեկին:

Այս հայտարարությամբ երեկ վերջակետ դրվեց ներքաղաքական ինտրիգին: ՀՀԿ-ն թեթևացած շունչ քաշեց, ԲՀԿ բիզնես շրջանակի ներկայացուցիչները՝ նույնպես, Հայ ազգային կոնգրեսի այն հատվածը, որ մեծ հույսեր էր կապում ԲՀԿ-ի հետ՝ խորը հիասթափություն ապրեց, ԲՀԿ-ամերձ ԶԼՄ-ները, որ զօրուգիշեր գոռում էին՝ «կոնսենսուս՝ մինուս Սերժ Սարգսյան», փորձում էին արդարացնել ԲՀԿ առաջնորդի կայացրած որոշումը, իսկ իշխող մեծամասնության ենթակայության տակ գտնվող լրատվամիջոցները, որ շաբաթ օրը կայացած Սերժ Սարգսյան-Գագիկ Ծառուկյան հանդիպումից հետո դադարեցրել էին գրոհը ԲՀԿ-ի վրա, երեկվանից խիստ պատկառանքով ու հարգանքով լցվեցին ԲՀԿ-ի հանդեպ: Հասկանալի է, որ թեև Ծառուկյանը պաշտոնապես հայտարարում է, թե իր կուսակցությունը որևէ թեկնածուի չի սատարելու, բայց ԲՀԿ-ն ոչ միայն չի խանգարելու Սերժ Սարգսյանին, այլև ոչ պաշտոնապես սատարելու է նրան: Անհասկանալի է միայն, թե դրան ինչ բացատրություն են տալու «կոնսենսուս՝ մինուս Սերժ Սարգսյան» գոռացող գրչակները: Իսկ «գալիք նախագահական ընտրություններում ԲՀԿ-ն չի սատարելու թեկնածուներից որևէ մեկին» ձևակերպումը տրված է միայն այն ակնկալիքով, որ ԲՀԿ-ն և Ծառուկյանը լիակատար ՕԵԿ-ի կամ ԱԽՔ-ի չվերածվեն: ԲՀԿ-ի կայացրած երեկվա որոշումն առնվազն անտրամաբանական է այս կուսակցության, մասնավորապես, վերջին շրջանի գործողությունների Ֆոնին: Այդ գործողությունները խոսում էին այն մասին, որ Ծառուկյանը միանշանակ առաջադրվելու է նախագահի թեկնածու, և հասել էին այն սահմանին, որ ետքայլի տեղ չկար, և հակառակը որևէ բացատրություն չէր ունենալու: Երեկ, երբ ԲՀԿ խոսնակ, Աժ պատգամավոր Տիգրան Ուրիխանյանին «ՀԺ»-ն հարցրեց, թե ինչու նման որոշում կայացվեց, երբ իրենց վերջին գործողությունները բացառապես տանում էին նրան, որ Ծառուկյանն առաջադրվելու է, նա պատասխանեց. «Ուզում եմ շեշտել՝ ԲՀԿ-ն, ԲՀԿ-ից որևէ մեկը, առաջնորդը՝ առավել ևս, երբեք չի ասել նախագահական ընտրությունների վերաբերյալ: Միշտ ասվել է մեկ բան՝ կգա պահը, նախագահական ընտրությունների հետ կապված՝ երբ ու ինչպիսի որոշում մենք կունենանք, կհայտնենք: Պահը եկավ, մենք հայտնեցինք մեր որոշման մասին, և զարմանում եմ այն զարմանքի վրա, որ առաջացել է մեր դիրքորոշման հետ կապված, ընդ որում, այն փորձերի, «շահագրգիռ» լրատվամիջոցների կամ ինչ-որ մարդկանց կողմից, որոնք փորձում են ներկայացնել որպես դիրքորոշման փոփոխություն այս ամենը»: ԲՀԿ խոսնակը նեղսրտեց թերթի այն հարցից, թե ԲՀԿ շարքերը ոչ պաշտոնապես սատարելո՞ւ են Սերժ Սարգսյանին: «Ես զարմանում եմ ձեր հարցից: Հարցը չեմ հասկանում, ի՞նչ եք ուզում այդ հարցով ճշգրտել, որովհետև ես ձեզ ներկայացրել եմ քաղխորհրդի և խմբակցության համատեղ որոշումները»: Ուրիխանյանն, ի դեպ, ըստ էության չբացառեց, որ նախագահական ընտրություններից հետո հնարավոր է՝ ՀՀԿ-ի հետ կոալիցիա ձևավորվի:

Դա երեկ «ՀԺ» հետ զրույցում չբացառեց նաև Աժ ՀՀԿ խմբակցության քարտուղար Հովհաննես Սահակյանը:

- Պարոն Սահակյան, ՀՀԿ-ն հենց այս հայտարարությա՞նն էր սպասում, թե ավելիին, որ Ծառուկյանը նաև կհայտարարի Սերժ Սարգսյանին սատարելու մասին:

- Մենք սպասում էինք և այսօր էլ սպասում ենք, որ ոչ միայն ԲՀԿ-ի, այլ բոլոր քաղաքական ուժերի նպատակը լինի մեկը, որ ընտրական պրոցեսներն անցնեն ազատ, արդար, թափանցիկ, և անկախ ամեն ինչից, մեր գործողությունների հիմնաքարը լինի այն, որ այս ընտրություններից հետո երկիրը գնա առաջ:

- Այսօրվա հայտարարությունը չի՞ նշանակում, որ ԲՀԿ-ն իրականում Սերժ Սարգսյանին է սատարելու, պարզապես ՕԵԿ չդառնալու համար է այդպես ձևակերպել հայտարարությունը:

- Կարծում եմ, որ տարբեր քաղաքական ուժերում կարող են լինել այնպիսի մարդիկ, ովքեր իսկապես կիսում են Սերժ Սարգսյանի տեսակետը, և այս պարագայում, երբ ԲՀԿ-ն որևէ մեկի չի սատարում, նաև այդ մարդկանց համար դրսևորվելու ազատ դաշտ է, և կարող են պաշտպանել Սերժ Սարգսյանի թեկնածությունը:

- Նախագահական ընտրություններից հետո ԲՀԿ-ի հետ կոալիցիա կձևավորվի՞:

- Նման հարց չի քննարկվել, բայց քաղաքականության մեջ ոչինչ չի բացառվում, ես չեմ կարող ասել:

- Վարչապետն ու Աժ նախագահն ասել են, որ ձեր օրակարգում կա սահմանադրական փոփոխությունների հարցը, որով նախատեսվում է նոր փոխվարչապետի պաշտոնի ստեղծում՝ ընդլայնված լիազորություններով:

- Այո, մենք նշել ենք, որ կա նման գաղափար, բայց այդ ամենին կանդրադառնանք նախագահական ընտրություններից հետո: Այսօր ամեն ինչ կախված է հենց նախագահական ընտրություններից:

- Հնարավո՞ր է՝ նախագահական ընտրություններից հետո վարչապետի պաշտոնը ԲՀԿ-ին տրվի:

- Մենք նմանատիպ հարց չենք քննարկել, և գործընթացներից ու երևույթներից առաջ կանխատեսումներ չանենք, սպասենք նախագահական ընտրություններին: