Գտել են Անդերսենի առաջին հեքիաթը

Դանիայում գտնվել է Հանս Քրիսթիան Անդերսենի՝ նախկինում անհայտ հեքիաթի ձեռագիրը: Այս մասին հայտնում է Politiken պարբերականը:
Ըստ փորձագետների՝ Անդերսենն այն գրել է դպրոցում սովորելու ընթացքում:

«Ուժեղ մոմը» անունով ձեռագիրը, ստորագրված հայտնի հեքիաթագրի կողմից, գտնվել է արկղում՝ այլ թղթերի մեջ: Հոկտեմբերին այն հայտնաբերեցին Օդենս քաղաքի արխիվում:

Երկու ամիս տևած փորձաքննությունից հետո գրողի ստեղծագործությունն ուսումնասիրող դանիացի գիտնականները հաստատել են դրանց՝ նույն հեղինակին պատկանելիությունը: Ըստ նրանց կարծիքի՝ Անդերսենն այդ հեքիաթը գրել է երիտասարդ տարիքում: Ի դեպ, հեքիաթի ոճը հիշեցնում է 1822-1826 թվականների աշխատանք:

Պատմելով մոմի կյանքի պատմությունը՝ հեքիաթասացը պատմում է կյանքում իր տեղը գտնելու, ներքին հակամարտությունների և շրջապատող դաժան աշխարհի մասին:

Հեքիաթի վերջում աղավաղված և իր հանդեպ հավատը կորցրած միայնակ մոմը հանդիպում է կայծքարին, որն էլ մոմին բացատրում է գոյության իմաստը: