Արտավազդ Փելեշյանին այսօր հանձնվել է ՀՀ քաղաքացու անձնագիր

Աշխարհահռչակ հայ ռեժիսոր-վավերագրող Արտավազդ Փելեշյանը ՀՀ քաղաքացի է: ՀՀ Նախագահ Սերժ Սարգսյանը ստորագրել է հրամանագիր, համաձայն որի՝ աշխարհահռչակ ռեժիսորին Հայաստանի Հանրապետության քաղաքացու կոչում է շնորհվել:

Դեկտեմբերի 13-ին անձանգիրը հանդիսավորությամբ հանձնեց ՀՀ մշակույթի նախարար Հասմիկ Պողոսյանը:

«Ես կարևոր պարտականություն եմ կատարում, քանի որ Փելեշյանը համաշխարհային ճանաչում ունեցող անձնավորություն է, որով հպարտանում է ամբողջ հայ ազգը և համայն մարդկությունը»,- ասել է հասմիկ Պողոսյանը:

Արտավազդ Փելեշյանը և նրա կինը՝ Աիդա Գալստյանն, արդեն որպես ՀՀ քաղաքացիներ, երդվեցին հավատարիմ լինել Հայաստանի Հանրապետությանը, պահպանել Հայաստանի Հանրապետության Սահմանադրությունը և օրենքները, պաշտպանել ՀՀ անկախությունն ու տարածքային ամբողջականությունը, հարգել ՀՀ պետական լեզուն, ազգային մշակույթն ու սովորույթները:

Մեծանուն ռեժիսորը չցանկացավ երկար շնորհակալական խոսքեր ասել, դրա փոխարեն ասաց կարճ և հանգամանալից. «Ֆիլմ է պետք նկարել»:

Կինոգետ Դավիթ Մուրադյանը նշեց, որ թեև Փելեշյանն այսօր «երկրի անձնագիր ստացավ, սակայն նրա արվեստը վաղուց մեր երկրի անձնագիրն է»:

«Նրա արվեստը ներկայացնում է մեր մշակույթը, հողի խորհուրդը, հայոց ճակատագիրը, և այդ անձանագիրն առանց վիզայի հաղթահարում է բոլոր սահմանները, որովհետև տաղանդի անձնագիր է»,-շեշտեց նա' հիշեցնելով, որ կան այդպիսի երևույթներ, որոնց հետ հաղորդակցվելիս դու քեզ զգում ես մեծ երկրի մարդ, այդպիսին է դարձնում Փելեշյանի կինոն: Մուրադյանը շեշտեց, որ նոր ստացած անձնագիրը մեկ անգամ ևս հաստատում է Փելեշյանի հասցեն, որը Հայաստանն է:

Հայաստանի ազգային կինոկենտրոնի տնօրեն Գևորգ Գևորգյանն Արտավազդ Փելեշյանին ճանաչում է արդեն 40 տարի:

«Թեև Հայաստանի անձնագիր հիմա է ստանում, բայց համամարդկային անձնագիր նա վաղուց ուներ: Փելեշյանի արվեստը սրտից է, դրա համար էլ համամարդկային է»,- ասաց նա: