Տաս օր հետո ՀՅԴ-ն կխոսի

«Մենք ունենք մեր մոտեցումները և դիրքորոշումները, հստակեցրել ենք, և տասը օր հետո ձեզ համար պարզ կդառնա նախագահական ընտրություններին ՀՅԴ-ի մասնակցության ձևաչափը»: Այս մասին քաղաքական և միջազգային հետազոտությունների հայկական կենտրոնի (ՔՄՀՀԿ)՝ ԱՄՆ-ի ազգային ժողովրդավարական ինստիտուտի հետ համատեղ հրավիրված քաղաքական բանավեճի ընթացքում ասաց ՀՅԴ Հայաստանի Գերագույն մարմնի փոխներկայացուցիչ Արսեն Համբարձումյանը: 

«Խորհրրդակցությունների փուլը, որ ավարտել ենք, չեմ բացառում, որ շարունակություն կունենա: Այս մեկ ամսվա ընթացքում փորձել ենք քաղաքական օրակարգ մեջտեղ բերել: Մենք կողմնակից ենք, որ այս ամբողջ գործընթացը հնարավորինս լինի հրապարակային: Ժամանակի հետ կապված՝ ես կարծում եմ, որ ավելի շուտ այդ սպասումները լրատվամիջոցների սպասումն է, քան հանրության: Ինչպես գիտենք, ընտրական օրենսգրքում փոփոխություններ են կատարվել, կտեսնեք, որ առաջադրման ժամկետների վերաբերյալ փոփոխություն կա՝ այն զգալի սեղմվել է»,-նշեց վերջինս:

Խոսելով հայաստանյան կուսակցությունների արտաքին կապերի մասին՝ Արսեն Համբարձումյանը նշեց. «Ով ով, բայց ՀՅԴ-ի պարագայում բնավ կարևոր չէ՝ ինչ մոտեցումներ ունեն արտաքին քաղաքական ազդեցությունները: Կտրականապես դեմ ենք ցանկացած արտաքին ուժի միջամտությանը: Այնպես որ ազդեցությունների պարագայում ՀՅԴ-ի որոշումը հստակ է»: