Ցուցադրական վարժանք ոստիկանության կրթահամալիրում

ՀՀ արտակարգ իրավիճակների նախարարության և ոստիկանության համագործակցության շրջանակներում դեկտեմբերի 13-ին ոստիկանության կրթահամալիրում կազմակերպվել էր ցուցադրական միջոցառում-վարժանք:

Ցուցադրությանը և վարժանքին ներկա էին ՀՀ ԱԻՆ ՓԾ տնօրենի տեղակալ Վրեժ Գաբրիելյանը, ՀՀ ոստիկանության կրթահամալիրի պետ, ոստիկանության գեներալ-լեյտենանտ Հովհաննես Վարյանը, կրթահամալիրի դասախոսական անձնակազմն ու 600-ից ավելի ուսանողներ:

Միջոցառման նպատակներն էին՝ ՀՀ ոստիկանության ակադեմիայի ուսանողներին ցուցադրել հրշեջ-փրկարարների հմտությունները՝ հրդեհաշիջման և վթարավերականգնողական աշխատանքներում, ինչպես նաև ծանոթացնել նրանց այդ աշխատանքներում օգտագործվող տեխնիկայի ու սարքավորումների հետ:

Վարժանքին ներգրավված էին ՀՀ ԱԻՆ փրկարար ծառայության հատուկ հրշեջ և հատուկ փրկարարական, Երևանի թիվ 4, 8 և 11 հրշեջ-փրկարարական, ճառագայթային ու կենսաբանական մոնիթորինգի ջոկատները և ճգնաժամային կառավարման կենտրոնի պարամեդիկների խումբը: Ցուցադրությանը ներկայացված էր 13 միավոր տեխնիկա՝ հրշեջ, փրկարարական, քիմիական պաշտպանության և պարամեդիկների մեքենաներ ու տարբեր սարքավորումներ:

Վարժանքի ընթացքում ցուցադրվեցին հրշեջ-փրկարարների հմտությունները՝ տուժածներին պարանների միջոցով շենքի պատուհանից իջեցնելու և վթարի ենթարկված մեքենայից անվնաս դուրս բերելու գործում:

Խոսելով միջոցառման կարևության մասին՝ ՀՀ ԱԻՆ ՓԾ տնօրենի տեղակալ, գեներալ-մայոր Վ. Գաբրիելյանը նշեց. «Այս վարժանքը կազմակերպվել է ՀՀ ԱԻՆ և ոստիկանության միջև համագործակցության շրջանակներում: Նպատակը՝ ոստիկանության կրթահամալիրի ուսանողներին ցույց տալ հրշեջ-փրկարարների հմտությունները, որպեսզի նրանք ծանոթ լինեն այն մեթոդներին և հնարքներին, որոնք օգտագործում են մեր փրկարարները տարբեր արտակարգ իրավիճակների ժամանակ: Այսօրվա ուսանողները վաղվա ոստիկաններն են, և նրանք պետք է իմանան, թե ինչ պետք է անել տարբեր աղետների դեպքում, որպեսզի ոստիկանների և փրկարարների համագործակցությունն էլ ավելի արդյունավետ դառնա»: