Ծրագիր` ուղղված ժողովրդավարության և միջմշակութային երկխոսության ամրապնդմանը

ՀՀ կրթության և գիտության նախարար Արմեն Աշոտյանն ընդունել է Պատմություն դասավանդողների Եվրոպական միության /ասոցիացիայի/ «ԵՎՐՈԿԼԻՈՅ» ծրագրի ներկայացուցիչներին, ովքեր դեկտեմբերի 7-14-ը ճանաչողական այցով գտնվում են Հայաստանում: Ողջունելով հյուրերին՝ նախարարն ընդգծել է, որ տարածաշրջանում ծրագիրը կարող է բախվել որոշակի խոչընդոտների, քանի որ հարևան Ադրբեջանի հանրակրթական դպրոցների դասագրքերում, ըստ Արմեն Աշոտյանի, պատմությունը հաճախ խեղաթյուրված է ներկայացվում, և հակահայկական քարոզչությունը նշված դասագրքերում երբեմն հասնում է աննախադեպ ծավալների:

«Խնդիրը քանիցս բարձրաձայնվել է. մենք դատապարտում ենք հարևան հանրապետության կողմից պատմության կեղծումը և դեմ ենք, այդ թվում նաև, նման նախագծերի միջոցով արհեստական մոտեցումների որդեգրմանը: Պատմությունը պետք է դուրս լինի քաղաքականությունից, լինի ճիշտ ներկայացված և հաստատված: Խնդիրը կայանում է նրանում, թե ինչպիսի միջազգային կրթական ռեսուրսներ, պրոֆեսիոնալ մոտեցումներ և համապատասխան մեթոդոլոգիա պետք է կիրառվեն: Մենք նաև դեմ ենք, որպեսզի արհեստական միջամտություններ արվեն և սահմանափակվեն գիտնականների ակադեմիական ազատությունները»,-նշել է նախարարը՝ ընդծելով, որ հարևան երկրների հետ համագործակցությունը պետք է սկսել թեկուզ փոքր շրջանակներից և նմանատիպ ծրագրերի' երիտասարդների միջև միջմշակութային երկխոսության հաստատելու միջոցով նաև հասնել որոշակի արդյունքի:

Հանդիպման ընթացքում ծրագրի պատասխանատուները նշել են, որ «Պատմության շարունակություն, մշակութային երկխոսություն» անվանմամբ ծրագիրը, որն իր շուրջն է համախմբել Հայաստանի, Ադրբեջանի, Վրաստանի, Մոլդովայի և Ուկրաինայի պատմության, մշակութային ժառանգության և քաղաքացիության կրթության բնագավառի մասնագետներին, նպատակաուղղված է մշակութային կրթության իրազեկության բարձրացմանը, հանրության շրջանում նոր ու պատասխանատու վերաբերմունքի ձևավորմանը: Ծրագրի պատասխանատու Սթիվեն Սթեյջերսը հույս է հայտնել, որ ծրագրի իրականացումը կնպաստի ժողովրդավարության և միջմշակութային երկխոսության ամրապնդմանը, կայուն հիմքեր կստեղծվի ներազգային և ազգամիջյան երկխոսության զարգացման համար, ինչպես նաև կբարելավվեն մշակութային կրթության բնագավառ ներկայացուցիչների մասնագիտական կարողությունները: Սթիվեն Սթեյջերսն ընդգծել է, որ ծրագրի ընթացքում մշակութային կրթության բնագավառի մասնագետները կլոր սեղան- քննարկումների, գիտագործնական դասընթացների և միջազգային սեմինարների ժամանակ կքննարկեն մշակութային կրթության զարգացման հեռանկարները Սևծովյան տարածաշրջանում, կծանոթանան մշակութային կրթության ուսուցման բարելավմանը միտված նորարարական եղանակներին ու մեթոդներին: Ծրագրի պատասխանատուների ներկայացմամբ' նախագիծը հիմնականում ուղղված է պատմություն, քաղաքացիական կրթություն դասավանդող մասնագետներին, տարրական և միջին դպրոցի ուսուցիչներին, ԲՈՒՀ-երի դասախոսներին, ուսումնական ծրագրեր մշակողներին, դասագրքերի հեղինակներին, ինչպես նաև ուսուցիչներ վերապատրաստողներին և փորձագետ-խորհրդատուներին:

Նախատեսվում է, որ ճանաչողական այցի ընթացքում ծրագրի անդամները կայցելեն Հայաստանի հանրակրթական դպրոցներ, բուհեր, ինչպես նաև կհանդիպեն հասարակական կազմակերպությունների ներկայացուցիչների հետ:

Հայաստանում ծրագրի ասոցացված գործընկերներն է՝ Հայաստանի պատմություն դասավանդողների ասոցիացիան /AAHE/։