ՀՀ մշակույթի նախարարը Մոսկվայում կմասնակցի ՀՀԽ և ՀՀՄՀ համատեղ նիստին

Հայաստանի Հանրապետության մշակույթի նախարար Հ. Պողոսյանը ս. թ. դեկտեմբերի 13-15-ը, որպես Հումանիտար համագործակցության միջպետական հիմնադրամի /ՀՀՄՀ/ վարչության Հայաստանի Հանրապետության ներկայացուցիչ՝ Մոսկվայում կմասնակցի Հումանիտար համագործակցության խորհրդի /ՀՀԽ/ և ՀՀՄՀ համատեղ նիստին: Նիստի օրակարգում նախատեսվում են ՀՀՄՀ գործունեությանն առնչվող մի շարք կարևոր հարցերի քննարկումներ.

* ՀՀՄՀ 2012 թ. ֆինանսական գործունեության ստուգման արդյունքները,

* ՀՀԽ և ՀՀՄՀ «Զվյոզդի Սոդրուժեստվա» 2012 թ. և «Սոդրուժեստվո դեբյուտով» 2013 թ. մրցանակաբախշությունները,

* ՀՀՄՀ 2012 թ. միջոցառումների պլանը՝ նոր խմբագրմամբ,

* ՀՀՄՀ 2013 թ. գործունեության միջոցառումների պլանը,

* ԱՊՀ անդամ պետություններում ՀՀՄՀ ներկայացուցչությունների հիմնադրման խնդիրները:

ՀՀ մշակույթի նախարար Հ. Պողոսյանի հետ Մոսկվա մեկնած պատվիրակության կազմում ընդգրկված են Հայաստանի ազգային արխիվի տնօրեն, Հայ գրատպության 500-ամյակի պետական հանձնաժողովի անդամ Ամատունի Վիրաբյանը, «ՌՈՍՍՈՏՐՈՒԴՆԻՉԵՍՏՈՎՈ» դաշնային գործակալության հայաստանյան ներկայացուցչության ղեկավար Վիկտոր Կրիվոպուսկովը, ՀՀ մշակույթի նախարարության աշխատակազմի արտաքին կապերի վարչության պետ Սվետլանա Սահակյանը, Հայաստանի հանրային հեռուստատեսության լրագրող Նունե Ալեքսանյանն ու օպերատոր Էդգար Դավթյանը:

Դեկտեմբերի 14-ին, Մոսկվայի մարզի «Զվյոզդնի գորոդոկ» քաղաքում հայաստանյան պատվիրակությունը կմասնակցի Հայ գրատպության 500-ամյակի տոնակատարությունների շրջանակներում կազմակերպած ակցիային. «ՌՈՍԿՈՍՄՈՍ» դաշնային տիեզերական գործակալության կողմից տիեզերք ուղարկված և երկիր վերադարձած «Հայոց այբուբենը» պաշտոնական պայմաններում կհանձնվի հայկական կողմին:

Միջոցառմանը կմասնակցեն նաև պաշտոնատար անձինք, մասնագետներ և МКС-32/33 արշավախմբի տիեզերագնացները: